Самарқанд вилоятида 19 нафар профилактика инспектори Ички ишлар тизимидан ҳайдалди. Бу ҳақда вилоят ИИБ бошлиғи Раҳмат Маматов иштирокидаги йиғилишда маълум қилинган.
Маълум бўлишича, вилоят ИИБ бошлиғи бошқарманинг жамоат хавфсизлиги ходимлари билан вилоятда жамоат хавфсизлигини таъминлаш, ҳуқуқбузарликларнинг олдини олиш масаласида, шунингдек хизмат интизоми ва қонунчиликка риоя этилиши борасида танқидий йиғилиш ўтказган.
Мазкур ҳолат бўйича «Дарё»га қўшимча ахборот берган вилоят ИИБ ахборот хизмати раҳбари Жаҳонгир Сагдуллаевнинг айтишича, тизимдан бўшатилган 19 нафар ходим фуқаролардан пул талаб қилгани, сабабсиз ишга чиқмагани ва хизмат вақтида спиртли ичимлик истеъмол қилгани учун жазоланган.
Тозалаш ишлари давом этяпти. Бошқарма бошлиғи иштирокидаги йиғилишда ўтирган ходимлар ҳам ота-оналари олдида охирги марта огоҳлантирилди. Яна хатога йўл қўйишса, улар ҳам ишдан кетади, — дейди Жаҳонгир Сагдуллаев.Таъкидланишича, йиғилишда доимий равишда камчиликка йўл қўйиб келган ходимлар ва уларнинг ота-оналари ҳам видеоселектор тарзида иштирок этган.
Ҳар бир профилактика инспекторига хизмат ҳудудидан хизмат уйи қилиб берилган. Имтиёз асосида транспорт харид қилишига имкон берилган. Ҳар кварталда ойлик маошидан ташқари қўшимча маблағ бериляпти. Хўш, бу имкониятнинг нимаси ёқмаяптики, қонунни бузяпсан? Бу бизни ўйлантиряпти, — дейди бошқарма бошлиғи Раҳмат Маматов.Вилоят ИИБ бошлиғи ИИБ ходими халқ хизматкори эканини айтган.
Ички ишлар ходими фуқаронинг хизматкори. Биз шу тамойил асосида ишлашимиз керак. Биз қачонгача буни қилма, ундай дема, хизмат текширув ўтказгин дейишимиз керак? Бундан кейин жазо бўлмайди. У тизимдан кетади, — деган бошқарма бошлиғи.
Раҳмат Маматов шунингдек, фуқаро ИИБ ходимига туҳмат қилгани учун жазоланган пайтда, нега ИИБ ходими фуқарога туҳмат қилгани учун, хатти-ҳаракати учун жавоб бермаслиги кераклигига эътибор қаратган.
Қонун ҳамма учун тенг бўлиши керакми?, — деган Раҳмат Маматов.
Мавзуга доир: Самарқанд вилояти ИИБ ЙҲХБга янги раҳбар тайинланди
Изоҳ (0)