2024-yilda Ichki ishlar vazirligi tizimida faoliyat yurituvchi 300 nafarga yaqin “uchastkavoy” tizimdan haydalgan, 100 nafarga yaqini lavozimidan bo‘shatilgan. Bu haqda 14-mart kuni AOKAda bo‘lib o‘tgan matbuot anjumanida vazirlikning Huquqbuzarliklar profilaktikasi xizmati boshlig‘i o‘rinbosari Rahimjon Naimov maʼlum qildi.
Ichki ishlar vazirligi Jamoat xavfsizligi departamenti Huquqbuzarliklar profilaktikasi xizmati masʼullari ishtirokida prezidentning “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish bo‘yicha chora-tadbirlar to‘g‘risida”gi qarori ijrosiga bag‘ishlangan matbuot anjumanida sohada amalga oshirilayotgan ishlar haqida maʼlumot berildi.
Matbuot anjumanida so‘z olgan “Daryo” jurnalisti soha masʼullariga yuzlanib, “Huquqbuzarliklar profilaktikasida asosiy masʼuliyatni olishi kerak bo‘lgan profilaktika inspektorlarining metan zapravkalarda o‘zga shaxslarga zo‘ravonlik qilib, “unday qilaman, bunday qilaman” deya vakolatidan foydalanishi, vakolatini suiisteʼmol qilishi kabi holatlar uchrayapti.
Eng achinarlisi ularning boshqa bir fuqaroning turmush o‘rtog‘i bilan qo‘lga tushib qolishi kabi voqealar uchrashi ularga nisbatan keskin chora ko‘rilmayotganidanmi? Yoki chora ko‘rilsa ham bu haqda jamoatchilikka oshkor etilmayotganidanmi? Ularga bu harakati uchun qanday choralar ko‘rilmoqda?”, deya savol berdi.
Ichki ishlar vazirligi Jamoat xavfsizligi departamenti Huquqbuzarliklar profilaktikasi xizmati boshlig‘i o‘rinbosari Rahimjon Naimovning maʼlumot berishicha, profilaktika inspektorlarining nopokligi, bilimsizligi, fuqarolar bilan qo‘pol munosabatlari sabab 2024-yilda ularning uch yuzga yaqini tizimdan haydalgan, 100 ga yaqini lavozimidan bo‘shatilgan.
Har bir tizimda bunday nopok xodimlar bor deb o‘ylayman. 2024-yilda yurtboshimiz raisligida o‘tkazilgan selektorda profilaktika inspektorlari tomonidan ko‘plab xato-kamchiliklar o‘tayotganligi, Vatanga sadoqati kamayib ketganligi va qing‘ir-qiyshiq, nopok ishlarga aralashib qolganligi bo‘yicha qattiq eʼtiroz bo‘lganidan so‘ng ichki ishlar vaziri farmoyishiga asosan 2024-yilning oktyabr oyidan boshlab respublika bo‘yicha navbatdan tashqari attestatsiya o‘tkazildi.
Aynan shu attestatsiyada tizimning yuzini yerga qaratadigan, tizimga dog‘ tushiradigan, bilim saviyasi past, fuqarolar bilan qo‘pol munosabatda bo‘lganlar bilan suhbat o‘tkazilib, 300 ga yaqin profilaktika inspektorlari ichki ishlar safidan bo‘shatildi, 100 ga yaqini lavozimidan olindi, deydi masʼul.
Rahimjon Naimovning qo‘shimcha qilishicha, metan zapravkadagi zo‘ravon IIB xodimi va boshqa erkakning turmush o‘rtog‘i bilan qo‘lga tushib kabi holatlar 2024-yilda sodir bo‘lgan voqealar bo‘lib, tozalash ishlaridan so‘ng 2025-yilning o‘tgan davri mobaynida bunday voqealar ro‘y bermagan.
Izoh (0)