Журналист Рухсора Ғафурова ўзгалар номига кредит олиб, уни ўзлаштирганликда гумон қилинаётган собиқ банк ходими ҳақида материал тайёрлаган ва уни эфирга узатгани ортидан маҳкамага тортилган эди. Суд бугун, 27 февраль куни ишни суриштирув органига қўшимча ўрганиш ва камчиликларни бартараф этиш учун қайтарди. Бу ҳақда “Дарё” мухбири хабар бермоқда.
-RAMdTQZF.jpg)
Нима бўлган эди?
Журналист ўзгалар номига истеъмол кредити олиб, уни ўзлаштирганликда гумон қилинаётган собиқ банк ходими ҳақида материал тайёрлаган ва уни эфирга узатган. Суриштирув кенг муҳокамаларга сабаб бўлган ва ҳолат юзасидан жиноят иши қўзғатилган.
Ўзгалар номига кредит олганликда гумон қилинаётган банк ходими ҳақидаги суриштируви ортидан журналист Рухсора Ғофуровага нисбатан маъмурий иш қўзғатилган. Журналистга Маъмурий жавобгарлик тўғрисидаги кодекснинг 46−2-моддаси (шахсга доир маълумотлар тўғрисидаги қонунчиликни бузиш) билан маъмурий ҳуқуқбузарлик тўғрисидаги иш қўзғатилган ва тўпланган ҳужжатлар жиноят ишлари бўйича Мирзо Улуғбек тумани судига оширилган эди.
Иш муддати ўтган
Рухсора Ғафуровани ҳимоя қилаётган адвокат Амрулло Аҳмедовнинг айтишича, 2025 йил 25 январь куни Мирзо Улуғбек тумани ИИБга ҳимоясидаги шахс билан борган ва ўша куни қўзғатилган маъмурий иш тугаллангани маълум қилинган.
Лекин менга, яъни адвокатга гарчи ҳуқуқим бўлса ҳам, иш билан танишишга имкон беришмади. ИИБ маъмурий ишни тамомлаб, судга юбориши керак эди. Лекин номаълум сабабларга кўра бу иш 27 февралгача чўзилиб келди.
Қонунчиликка кўра, жиноят ишини қўзғатиш рад этилган ёки жиноят иши тугатилган бўлса-ю, лекин ҳуқуқбузарнинг ҳаракатларида маъмурий ҳуқуқбузарлик аломатлари мавжуд бўлса, қарор қабул қилинган кундан эътиборан бир ойдан кечиктирмай қўлланиши лозим. Шундан келиб чиқиб, Рухсора Ғафурова айбли, деб топилган тақдирда ҳам уни кўриш муддати ўтиб кетган, деди Амрилло Аҳмедов.
Маъмурий жавобгарликка асос йўқ
Журналистнинг яна бир адвокати Давронбек Аҳмадовнинг айтишича, Рухсора Ғафурованинг хатти-ҳаракатларида маъмурий жавобгарлик таркиби мавжуд эмас.
Журналистнинг вазифаси — журналистик суриштирув натижасида тайёр бўлган маҳсулотни жамоатчиликка етказиш. Агар журналист маҳсулотини оммага етказмайдиган бўлса, маъмурий ёки жиноий ҳуқуқбузарлик, сиёсий-ижтимоий ҳолат ҳақида хабардор қилмайдиган бўлса, журналистик суриштирувнинг мазмун ва моҳияти йўқолади.
Агар журналист суриштирув натижаси бўйича жиноят ҳақида хабар берилса ва бу хабар орқали бошқа шахсларнинг ҳуқуқ ва манфаатлари ҳимоя қилинадиган бўлса, бу ҳолатда жиноят содир қилган шахс ёки ҳуқуқбузарлик қилган шахс исм-шарифини идентификация қилиш маъмурий жавобгарлик таркибини бермайди. Чунки у жиноят ҳақида ёки бошқа ижтимоий-сиёсий ҳолат ҳақида хабар бермоқда. Яъни шахснинг исм ва фамилияси очиқланиши шахсга доир маълумотни бузиш ҳисобланмайди.
Бу ҳолатда ички ишлар органлари шошма-шошарлик билан, бир тарафлама ёки бошқа субъектив сабабларга кўра ишни судга олиб чиққан. Кўриниб турибдики, шошма-шошарлик билан қарор қабул қилингани учун ҳам бугун суд ишни суриштирувга, қўшимча ўрганишга қайтарди, деди адвокат.
Унинг қўшимча қилишича, агар ички ишлар органлари суд томонидан кўрсатилган камчиликларни бартараф этса, иш яна қайта судга олиб чиқилади. Аксинча, кўрсатилган камчиликлар бартараф этилмаса, иш тугалланиши ҳам мумкин.
Адвокатларнинг айтишича, аризачи тараф (собиқ банк ходими) судга Рухсора Ғафуровага нисбатан даъвоси йўқлиги ҳақида хат берган. “Дарё” мухбири мазкур хат масаласида изоҳ олиш учун суд биносида иккинчи тарафни ёки унинг бирор вакилини тополмади. Агар шундай бўлса, иш Маъмурий жавобгарлик тўғрисидаги кодекснинг “ярашилганлиги муносабати билан маъмурий жавобгарликдан озод қилиш” моддаси билан тугалланиши мумкин.
Маълумот учун, суд ишига Ўзбекистон журналистлар уюшмасининг вакили ва унинг ҳуқуқшуноси жамоат ҳимоячиси сифатида ҳозир бўлди.
Олий суд жамоатчилик билан алоқалар маркази раҳбари Азиз Обидовнинг маълум қилишича, ишни кўриб чиқишга тайёрлаш вақтида иш ҳужжатлари Маъмурий жавобгарлик тўғрисидаги кодекснинг 303-303-1-моддалари талаблари бузилган ҳолда судга юборилгани аниқланган. Шу сабабли ушбу иш материали қайта расмийлаштириш учун Мирзо Улуғбек тумани ИИО ФМБга қайтарилган.
Изоҳ (0)