Тошкент вилоятининг Тошкент туманида маҳалла профилактика инспектори пичоқланди. Бу ҳақда “Дарё” манбаси хабар берди.
Билдирилишича, воқеа кеча, 8 апрель куни соат тахминан 21:10 да содир бўлган.
Тошкент туманидаги “Қорасарой” маҳалла фуқаролар йиғинида яшовчи ака-ука ўзаро жанжаллашиб қолгач, муқаддам судланган ака укасини ўлдириш учун унга пичоқ ўқталган. Бундан қўрқиб кетган ука воқеа жойидан қочиб чиқиб, ҳудуд профилактика инспекторига хабар берган. ИИБ ходими воқеа жойига етиб келганда ака ҳамон ҳовуридан тушмаган бўлган. У профилактика инспекторининг огоҳлантиришларига қарамай, қўлидаги пичоғини ташламаган. Боз устига ИИБ ходимига ҳам қаршилик кўрсатиб, уни пичоқлаб қўйган, — дейди манба.
Манбанинг қўшимча қилишича, айни пайтда ИИБ ходими шифохонага ётқизилган.
Бош прокуратура ахборот хизмати раҳбари Ҳаёт Шамсутдиновнинг “Дарё” сўровига жавобан маълумот беришича, ҳолат бўйича Жиноят кодексининг 219-моддаси 2-қисми (хизмат вазифасини бажараётган ҳокимият вакилига бурчини бажаришдан воз кечишга, шунингдек, қонунга хилоф ҳаракатлар содир этишга мажбур қилиш) билан жиноят иши қўзғатилган. Фуқаро процессуал тартибда ушланган. Туман прокуратураси томонидан дастлабки терговга қадар текширув ҳаракатлари олиб борилмоқда.
Изоҳ (0)