Тошкент ва Андижон вилоятларида мувофиқлик сертификати ҳамда битим олиб беришни ваъда қилган шахслар ушланди. Бу ҳақда Бош прокуратура ҳузуридаги департамент хабар берди.
Қайд этилишича, департаментнинг Чирчиқ шаҳар бўлими томонидан ДХХ ходимлари билан ҳамкорликда тадбиркорлик субъектлари ҳуқуқларини ҳимоя қилиш юзасидан тезкор тадбир ўтказилган. Тадбирда фуқаро Ш.Д. “C.Б.” МЧЖ раҳбари Ш.Ш.нинг ишончига кириб, унга гўёки юқори лавозимда ишловчи танишлари ёрдамида ушбу МЧЖда ишлаб чиқарилган бетон маҳсулотлари учун Тошкент вилояти “Қурилиш ва уй жой коммунал соҳасида ҳудудий назорат инспекцияси”нинг лаборатория хулосаси ҳамда мувофиқлик сертификатини расмийлаштириб бериши эвазига 700 долларни олган вақтида ашёвий далиллар билан ушланган.
Шу каби, департаментнинг Асака туман бўлими томонидан ДХХ ва ИИБ ходимлари билан ҳамкорликда ўтказилган тезкор тадбирда М.Ж. исмли шахс фуқаро Д.С.нинг ишончига кириб, унга юқори лавозимда ишловчи танишлари ёрдамида оилавий мактабгача таълим ташкилоти ташкил қилиши учун битим тайёрлаб бериши эвазига 500 долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Бухорода 2 минг долларга тил сертификатини олиб беришни ваъда қилган институт ўқитувчиси ушлангани, Қорақалпоғистонда имтиҳонсиз ҳайдовчилик гувоҳномаси олиб беришни ваъда қилган шахслар қўлга олингани, Ховос тумани ҳокими ўринбосари, Қарши тумани ИИБ ходими ва Сергели тумани профилактика инспектори пора билан қўлга тушгани тўғрисида хабар берилганди.
Изоҳ (0)