Ҳуқуқни муҳофаза қилувчи органлар томонидан ўтказилган тезкор тадбирларда жами 111 кг наркотик модда мусодара қилинди.
Маълум қилинишича, Самарқанд вилоятида Тожикистоннинг Сўғд вилояти, Панжикент туманидан айланма йўллар орқали 10 кг 894 грамм опий моддасини Ургут тумани ҳудудига олиб келган Тожикистон фуқаролари – 1980, 1982, 1989 йилларда туғилган 3 нафар ака-ука ушланди.
Шунингдек, уларнинг жиноий шериги бўлган, Ургут туманида истиқомат қилувчи, 1982-й.т. аёл ҳам ушланган. Унинг яшаш хонадонида сақланаётган 13 кг 85 грамм опий моддаси процессуал тартибда расмийлаштириб олинди.
Ҳозирда мазкур шахсларга нисбатан жиноят иши қўзғатилиб, қамоқ эҳтиёт чораси қўлланилди.
Шу билан бирга, ўзбек-тожик давлат чегарасининг Тошкент вилояти, Бекобод тумани, “Турон” МФЙ ҳудудидан ўтувчи қисмида Тожикистоннинг Сўғд вилояти, Мастчох туманидан Бекободга оқиб ўтувчи Далварзин канали орқали 3 дона елим идиш оқизиб юборилган. Идишда жами 8 кг 381 грамм опий ва 59 кг 296 грамм гашиш моддалари борлиги аниқланди.
Ушбу гиёҳвандлик воситаларини қабул қилиб олиш мақсадида чегара ҳудудига келган вақтларида Бекобод шаҳри ва туманида истиқомат қилувчи, 1985, 1989, 1996 ва 1997 йилларда туғилган 4 нафар фуқаро қўлга олинди. Улардан 2 нафари муқаддам судланган шахслар ҳисобланади.
Ҳозирда уларга нисбатан Жиноят кодексининг 246-моддаси 2-қисми (ядровий, кимёвий, биологик ва оммавий қирғин қуролининг бошқа турларини, шундай қуролларни яратишда фойдаланилиши мумкинлиги аён бўлган материал ва мосламаларни, радиоактив материалларни, шунингдек гиёҳвандлик воситалари, уларнинг аналоглари ёки психотроп моддаларни кўп миқдорда контрабанда қилиш) ва 273-моддаси 5-қисми (гиёҳвандлик воситалари, уларнинг аналоглари ёки психотроп моддаларни кўп миқдорда қонунга хилоф равишда сотиш) билан жиноят иши қўзғатилиб, қамоқ эҳтиёт чораси қўлланилди.
Бундан ташқари, Бекобод туманида ўзбек-тожик давлат чегарасидан тахминан 400-500 метр узоқликдаги дала майдонида муқаддам номаълум шахслар томонидан қолдириб кетилган 1 дона спорт сумкаси ичида 3 кг 942 грамм опий ва 15 кг 473 грамм гашиш моддалари борлиги аниқланди.
Ҳозирда ҳолат юзасидан Жиноят кодексининг 273-моддаси 5-қисми (гиёҳвандлик воситалари, уларнинг аналоглари ёки психотроп моддаларни кўп миқдорда қонунга хилоф равишда сотиш) билан жиноят иши қўзғатилди.
Ҳозирда гиёҳвандлик воситаларини қолдириб кетган шахсларни аниқлаш бўйича зарур чора-тадбирлар амалга оширилмоқда.
Изоҳ (0)