Ўзбекистон ДХХ ҳамда ИИВ тузилмалари тунги клублар ва бошқа жамоат жойларида рейд ўтказди

Ўзбекистон ДХХ ҳамда ИИВ тузилмалари томонидан жорий йилнинг 5—7 февраль кунлари мамлакат миқёсида “Орият” ва “Қорадори” кенг кўламли тадбирлари ўтказилди.

Маълум қилинишича, 7 февраль куни ўтказилган “Орият” кенг кўламли тезкор-профилактик тадбирлари давомида ахлоқ ва соғлиққа қарши қаратилган жиноятларни аниқлаш, ОИВ (ОИТС) ва бошқа турдаги юқумли, тери-таносил касалликларининг тарқалишини олдини олиш мақсадида сауналар, СПА салонлар, массажхоналар, караоке барлар, меҳмонхоналар, хостеллар, тунги клублар ва бошқа жамоат жойларида ҳамкорликдаги тадбирлар олиб борилди.

Тадбирлар доирасида 340 та объект текширилиб, аҳоли саломатлигига хавф солиши мумкин бўлган 2 957 нафар шахслар билан тушунтириш ишлари олиб борилди ва мобил тарзда шифокор кўригидан ўтказилиб, тегишли тиббий хулосалар олинди.

Аниқланган ҳолатлар бўйича қўзғатилган 93 та жиноят ишлари доирасида 94 киши жиноий жавобгарликка тортилди. 153 киши маъмурий жавобгарликка тортилиб, 1920 нафар шахслар билан профилактик суҳбатлар ўтказилди ҳамда уларнинг 766 нафари расмий огоҳлантирилди.

“Қорадори” тадбирларининг иккинчи босқичида жами 640 та махсус тезкор тадбирлар доирасида 1401 нафар гиёҳвандлик воситаларини тарқатиш, сақлаш, истеъмол қилишда гумон қилинган шахслар билан тезкор ва профилактик огоҳлантирув тадбирлари амалга оширилди.

Ўтказилган тадбирлар давомида жами 28 килограмм 857 грамм гиёҳвандлик воситалари (героин, опий, гашиш, синтетик турдаги гиёҳвандлик воситалари) ҳамда 9 421 дона кучли таъсир қилувчи ва психотроп дори воситаларининг аҳоли орасида тарқатилиши тўхтатиб қолинди. 18 та ноқонуний ўқотар қурол ва 126 дона совуқ қуроллар аниқланди.

Шунингдек, 339 кишига нисбатан 269 та жиноят иши қўзғатилди ҳамда 119 нафар шахслар маъмурий жавобгарликка тортилди. 53 нафар қидирувдаги шахслар ушланди. 656 нафар шахслар билан профилактик суҳбатлар ўтказилиб, 234 нафари расмий огоҳлантирилди.

Telegramъда олиб борилган тезкор тадбирлар давомида Тошкент вилояти, Юқоричирчиқ туманида 1 кило синтетик гиёҳвандлик воситаси “закладка” усулида кўмилгани тўғрисида тезкор маълумот олинди.

Маълумот асосида олиб борилган тадбирлар натижасида 1986 ва 2002 йилда туғилган, икки нафар шахс гиёҳвандлик воситасини кўмилган жойдан олаётган вақтида ушланди. Улардан бири яшаб келаётган Миробод туманидаги уйнинг турли жойларида “закладка” усулида тарқатиш учун тайёрлаб қўйилган жами 200 грамм синтетик гиёҳвандлик воситаси, электрон тарози, изоляцион лента ва зип-пакетлар борлиги аниқланиб, ашёвий далиллар ҳужжатлаштириб олинди.

Одам савдосига қарши курашиш йўналишида ўтказилган тезкор тадбирда 1986 йилда туғилган, Тошкент шаҳрида вақтинча яшаб келаётган Туркия фуқароси ва икки нафар Ўзбекистон фуқаролари қўлга олинди. Ушбу шахслар ўзаро жиноий тил бириктириб, жинсий эксплуатация қилиш мақсадида икки нафар аёлни Тошкент халқаро аэропорти орқали Истанбулга жўнатаётган вақтларида тадбир иштирокчилари томонидан ушланди.

Пойтахт ҳудудида ўтказилган тезкор-қидирув тадбирлари давомида 1980 йилда туғилган шахс Учтепа туманида 1987 йилда туғилган фуқарога таҳдид қилиб, унинг юз соҳасига бир неча маротаба ургани ва нархи 280 АҚШ доллари бўлган қўл телефони ҳамда 460 минг сўм пулларини қўлга киритиб, воқеа жойидан яширингани аниқланди. Унга нисбатан жиноят иши қўзғатилиб, “қамоқ” эҳтиёт чораси қўлланилди.

Шунингдек, ушбу шахснинг таниши ўзининг яшаш манзилида “Макаров” пистолетини сақлаб келаётгани ҳақида тезкор маълумот олинди. 6 февраль куни 1978 йилда туғилган мазкур шахс ушланиб, унинг Учтепа туманидаги уйида ўтказилган тинтув давомида, 1980 йилда ишлаб чиқарилган 1 дона “Макаров” пистолети, 2 дона ўқдон ва 15 та жанговар патронлар аниқланиб, тегишли тартибда ҳужжатлаштириб олинди.

Криминоген вазиятни барқарорлаштириш борасидаги тезкор тадбирлар бошқа йўналишларда ҳам давом эттирилади.

ДХХ ҳамда ИИВ тузилмалари томонидан 27—31 январь кунлари мамлакат миқёсида “Антитеррор-тозалаш” кенг кўламли тадбирлари ўтказилганди. Криминоген вазиятни барқарорлаштириш ва унга салбий таъсир кўрсатувчи шахс ва жиноий гуруҳларни аниқлаш мақсадида жами 946 та махсус тадбирлар ўтказилиб, оғир ва ўта оғир жиноятлар содир этишга мойил 418 киши ушланганди. 

ДХХ ҳамда ИИВ тузилмалари томонидан 2025 йилнинг 3—4 февраль кунлари мамлакат миқёсида “Қорадори” кенг кўламли тадбирларининг дастлабки босқичи олиб борилди. Унда 112 килодан ортиқ гиёҳвандлик воситалари мусодара қилинди