2001-yil noyabr oyida Joan Roulingning sehrgar bola haqidagi “Garri Potter va hikmatlar toshi” (1997) romani ilk bor ekranlashtirildi. Film jamoatchilik tomonidan shu qadar ijobiy qarshi olindiki, ishlab chiqarish uchun 125 million dollar va film targ‘iboti uchun yana 40 million dollar mablag‘ sarflagan film kassada 1 milliard dollar yig‘a oldi. 2024-yil holatiga ko‘ra, mazkur loyiha barcha davrlarning eng yuqori daromad keltirgan filmlari ro‘yxatida 49-o‘rinni egallab turibdi.
Franshizada Garri, Germiona va Ron ismli bosh qahramonlar — Xogvarts maktabi o‘quvchilari haqida hikoya qilinadi. Unda Deniel Redkliff, Emma Uotson va Rupert Grint kabi aktyorlar o‘ynagan. Garri Potter obrazi uchun bosh qahramonni topish butun kasting jarayonining eng qiyin qismi bo‘lgan. Boshqa rollar uchun deyarli barcha aktyorlar allaqachon tanlangan vaqtda Garriga da’vogarlik qiladigan bola topilmagan.
So‘ng yosh Devid rolini o‘ynagan “Devid Kopperfild” filmini tasodifan tomosha qilgan rejissyor Kris Kolumb shu zahotiyoq o‘zlariga kerak bo‘lgan aktyor kim ekanligini anglab yetgan. Avvaliga Redkliffning ota-onasi bunga rozi bo‘lmagan, ularni ko‘ndirishga rejissyor uzoq vaqt uringan va oxir-oqibat masala ijobiy hal qilingan.
Franshiza sehrli olamga sho‘ng‘ishga majbur qiladigan ajoyib syujet va unutilmas qahramonlarga to‘la, ammo eng mukammal tarzda ishlangan filmlarda ham kichik xatolar uchrab turadi. Quyida e’tiborli tomoshabinlar nigohidan chetda qolmagan qiziqarli xatoliklarni ko‘rib chiqamiz.
1. Ko‘ylakning o‘zgarib qolishi
Garri hayvonot bog‘iga borishdan avval amakisi Vernon bilan tashqarida suhbatlashadi. Bu sahnada Deniel qahramoni futbolkasi ustidan siyohrang ko‘ylak kiygan. Ammo Vernon amakining orqasidan ko‘rsatilgan kadrda Garrining ko‘ylagi egnidan tushib ketgan holatda ekanligini ko‘rish mumkin.
2. Chandiqning yo‘qolib qolishi
“Garri Potter va hikmatlar toshi”dagi sahnalardan birida Garri Ollivander do‘konida tayoqcha tanlashga keladi. Navbatdagi tayoqchani sinab ko‘rayotgan paytda avval uning peshonasida mashhur chaqmoq shaklidagi chandiq ko‘rinmaydi. Ammo keyingi kadrda uning sochlari orqaga uchib, peshonasi ochilganda chandiq to‘satdan paydo bo‘lib qoladi.
3. O‘quvchilar o‘rnining almashib qolishi
Fakultetlarga taqsimlovchi shlyapa Garrini Griffindorga yo‘naltirgandan so‘ng, u fakultet stoliga borib, Ronning yonidan joy oladi. So‘ng Albus Dambldor ziyofatga ijozat bergach, Garri o‘tirgan stol ko‘rsatiladi. Bu vaqtda qahramon endilikda Germiona va Persi o‘rtasida o‘tirgan holatda namoyon bo‘ladi.
4. Fakultetlarga taqsimlash marosimi
Ko‘pgina muxlislar Xogvartsdagi fakultetlarga taqsimlash marosimi nega asl manbadagi kabi alifbo tartibida emas, balki tartibsiz o‘tkazilganiga hayron qoladi. Bunday holatda cheklangan ekran vaqtini hisobga olinsa, Potterni kutish uchun uzoq muddat talab etilar edi. Ammo nima uchundir syujetning keyingi qismida hech qanday rol o‘ynamagan ba’zi bolalar ko‘rsatilgan? Masalan, Syuzan Bouns ismli qiz film boshida Puffenduy fakultetiga yuboriladi. Ushbu rolni Kris Kolambusning qizi Eleonora Kolabmus ijro etgan. Keyinchalik u “Garri Potter va maxfiy hujra”da ham ishtirok etgan.
5. Sochlar
Syujetga ko‘ra, “Garri Potter va hikmatlar toshi”da Kvirinus Kvirrel kal ko‘rinishda bo‘lgan, biroq film davomida ba’zi kadrlarda aktyor kiygan salla ostidan qora sochlar ko‘zga tashlanadi.
6. Kviddich
Griffindor kviddich jamoasining sardori va darvozaboni Oliver Vud Garrini maydonga olib keladi va o‘yin qoidalari bilan tanishtiradi. Shu vaqtda kadrda ularning ortida yo‘l ko‘rinib turadi. Keyin mashg‘ulotlar maydoni Hogvarts minoralaridan birining balandligidan ko‘rsatilganda ortdagi yo‘l yo‘qoladi va yam-yashil maydon qoladi.
Izoh (0)