Андижонда олимпия ва паралимпия спорт турларига тайёрлаш маркази 2022—2025 йилларда 16 та энг яхши таклиф танлаш бўйича танлов ўтказган. Шундан 8 тасида бир-бирига боғлиқ корхоналар ғолиб чиқди. “Дарё” мухбири тендер ҳужжатларини ўрганди.
Мебелчилар овқатланиш хизматини кўрсатмоқчи. Бу — ҳазил эмас
Энг янгисидан бошлаймиз. Марказ шу йилнинг 13—20 февраль кунлари овқатланиш хизматларини кўрсатиш бўйича тендер ўтказди. Лотнинг бошланғич қиймати салкам 2,1 миллиард сўмни ташкил этган.
Унда “Lucky kinder garten” ва “Фаровон улкан савдо” МЧЖлар рақобатлашган ва “Lucky kinder garten” ғолиб чиққан. Шартнома суммаси 2 миллиард 90 миллион сўм. Корхона 2023 йилнинг июль ойида ташкил этилган, фаолияти буюртмачига кўрсатилганидек, озиқ-овқат эмас, балки мебел ишлаб чиқаришга мўлжалланган. Бундан ташқари, тендерга илова қилинган ҳужжатларда ташкилот ўз балансида бинолар мавжудлигини келтирган бўлса-да, кадастр паспортида келтириб ўтилган объектларни davreestr.uz порталидан топишнинг иложи бўлмади.
Компьютерчими ёки ошпазлар?
Марказнинг бошқа тендерларини ҳам ўргандик ва янада қизиқроқ ҳолатга дуч келдик. Маълум бўлишича, спортчиларни овқатлантирмоқчи бўлаётганлар фақат мебелчилар эмас, компьютерчилар ҳам айни шу ниятда. Яна улар бу ишни анчадан буён бажариб келаётганига нима дейсиз?
Спорт марказининг охирги уч йилда овқатланиш хизмати бўйича ўтказган 16 та тендерининг 6 тасида ғолиб чиққан “Best meals таъминот” МЧЖ — компьютер, периферик ускуналар ва дастурий таъминот улгуржи савдосига ихтисослашган. Шундай бўлса-да, корхона уч йилда 6,5 миллиард сўмдан ортиқ ишни бажаришга улгурган.
Ушбу корхона биринчи бор марказ тендерида ғолиб чиққанида атиги бир ойлик эди. Яъни, 2022 йилнинг 23 сентябрь куни ташкил этилганидан бир ой ҳам ўтмай бошқа йўналишдаги катта тендерларда ғалаба қозонишни уддалаган. Энг қизиғи, у барча танловларда буюртмачи ташкил этилаётган нархдан бир озгина (5 мингдан 1 миллионгача) арзонроқ нарх таклиф этиб, ғолиб чиқади. Масалан, корхона сўнгги маротаба 2024 йилнинг декабрь ойида бошланғич нархи 556 миллион 339 минг сўмлик тендерни 460 минг сўм фарқ билан қўлга киритган.
Ғолиб корхоналар бегона эмас
Статистика агентлиги маълумотларига кўра, “Best meals таъминот” МЧЖнинг таъсисчилари Исаков Хусниддин Срожидинович ва Исомиддинов Журъатбек Мухиддин ўғли, раҳбари эса Махмуджонов Муҳаммадали Қодиржон ўғли ҳисобланади.
Муҳаммадали Маҳмуджонов эса марказнинг яқиндагина ўтказган йирик тендерларида ғолиб чиққан “Lucky kinder garten” МЧЖнинг юз фоизлик улушига эга. Яъни иккала корхона бир-бирига чамбарчас боғлиқ. Буни тендерга тақдим қилинган ҳужжатлар ҳам бевосита тасдиқлайди.
“Дарё” мухбири ҳолат юзасидан изоҳ олиш мақсадида Муҳаммадали Маҳмуджонов билан боғланди. У корхона асли эгаси бошқалар эканлигини, у номигагина ҳужжатда таъсисчи ва раҳбарлигини айтиб, эгалари ўзлари боғланишини билдирди. Бироқ ҳеч ким боғланмади.
Сўз — Коррупцияга қарши курашиш агентлиги ва бошқа масъул идораларга.
“Дарё” энг қизиқарли тендер савдоларини кузатишда давом этади.
Изоҳ (0)