Бир неча кундан бери сўз устаси Валижон Шамшиевнинг 12-маротаба ота бўлганлиги ҳақидаги хабар ижтимоий тармоқларда кенг муҳокама қилинмоқда. Қизиқчи ўзбек шоу-бизнесининг энг серфарзанд вакилларидан бири, бироқ бу борада биринчилик хонанда Ботир Қодировда. Қуйида беш ва ундан кўпроқ фарзандларни тарбиялаётган ўзбекистонлик машҳурлар ҳақида сўз юритилади.
Нилуфар Усмонова
Ўзбекистон халқ артисти Юлдуз Усмонованинг ёлғиз фарзанди хонанда Нилуфар Усмонова болалигидан катта оиласи бўлишини орзу қилган. Шунинг учун ҳам бугун у беш фарзанд — уч ўғил ва икки қизнинг онаси. Нилуфар Усмонова шахсий ҳаётини доим мухлисларидан сир тутган. У биринчи марта турмуш қурганида жуда ёш бўлган.
Хонанда интервьюларидан бирида ҳаётида бир мартагина расман турмуш қургани ҳақида сўзлаб берган. Шунингдек у айни пайтда фарзандларига ҳам ота, ҳам она эканлигини таъкидлаб ўтган. Нилуфарнинг тўнғич ўғли Саидаъзамхон айни пайтда Лондондаги олий ўқув муассасаларидан бирида таҳсил олмоқда. Хонанда фарзанди ишлаб пул топа бошлагач, уни уйлантириб қўйиши ҳақида айтиб ўтган.
Нигина Набиева
2000 йилларда “Олмали аймоқча” қўшиғи билан танилган хонанда Нигина Набиева 2025 йилда эгизак фарзандларни дунёга келтирди ҳамда ўзбек шоу-бизнесидаги энг серфарзанд ижодкорлардан бирига айланди. Нигина ҳозирда тўрт ўғил ва икки қиз — жами олти фарзанднинг онаси ҳисобланади.
Нигина Набиева турмуш ўртоғининг иши сабабли бир неча йил АҚШда яшади. Ҳозирда у оиласи билан Тошкентга қайтган. Хонанда фарзандли бўлишидан аввал бир нечта янги қўшиқларини мухлислари эътиборига ҳавола этди.
Жаҳонгир Позилжонов
2008 йилда бўйдоқлар сафини тарк этган “Божалар” гуруҳи яккахони Жаҳонгир Позилжонов ҳам серфарзанд хонандалардан бири ҳисобланади.
“Бойвачча” фильмини суратга олиш жараёнида танишган Жаҳонгир Позилжонов ва Дилдорахоннинг икки ўғил ҳамда уч қизи бор. Хонанда тўнғич ўғлига Ғайратжон, дея отасининг исмини, яна бирига эса марҳум дўсти Мўмин Ориповнинг исмини қўйган.
Озодбек Назарбеков
Ўзбекистон маданият вазири, таниқли хонанда Озодбек Назарбеков саккиз фарзанднинг отаси ҳисобланади. Хонанда уч қизини турмушга берган, тўнғич ўғли Жаъфарни уйлантирган. Унинг бир нечта неварлари бор.
Озодбек Назарбеков 2022 йилда ижтимоий тармоқлардаги чиқишлари билан машҳур бўлган Шукуржон домла Эгамбердиевнинг (Шукуруллоҳ домла) қизи Марзияхонни ўғли Жаъфарга келин қилган. Ушбу тўйда кўплаб ўзбекистонлик машҳурлар иштирок этган эди.
2023 йилда Озодбек Назарбеков қизи Зиннурани хонанда Ёрқинхўжа Умаровга узатди. Ушбу тўй ҳам шоу-бизнеснинг энг таниқли вакиллари иштирокида нишонланди.
2024 йилнинг ёзида Ёрқинхўжа Умаров ва Зиннура Назарбекова илк марта ота-она бўлишди.
35 ёшли киноактёр Йигитали Мамажонов беш фарзанднинг отаси ҳисобланади. Унинг хонанда Райҳон билан никоҳидан Ислом ва Имрон исмли эгизак ўғиллари, иккинчи турмуши Нигина исмли аёлдан қизи бор.
2018 йили актриса Муқаддас Саъдуллаевага уйланганини оммага маълум қилган Йигитали Мамажоновнинг учинчи турмушидан Абубакр ва Ҳадича исмли фарзандлар дунёга келган. У ҳозирда Муқаддас Саъдуллаева билан бахтли турмуш кечирмоқда.
Ҳамид Тошпўлатов
“Меҳмонжонлардан айланай” сериалидаги роли орқали кўпчиликка яхши таниш актёр, Ўзбекистонда хизмат кўрсатган артист Ҳамид Тошпўлатовнинг ўзи ҳам серфарзанд оилада туғилган. У ўн икки нафар фарзанднинг бири ҳисобланади. Актёрнинг беш қиз ва икки ўғил фарзанди, кўплаб неваралари бор.
Муҳаммаджон Бобожонов
Асосан комедик жанрдаги роллари билан танилган актёр Муҳаммаджон Бобожонов ўзбек шоу-бизнесида энг серфарзанд оталардан ҳисобланади. Чунки унинг олти нафар қизи ва бир ўғли бор.
Эркин Комилов
Ўзбекистон халқ артисти Эркин Комилов умри давомида уч марта оила қурган. Икки аёли ҳаётдан эрта кўз юмган. Унинг уч турмушидан беш қиз ва икки ўғил фарзанди бор. Устоз санъаткор ҳозирда Маҳбубахон исмли турмуш ўртоғи билан бирга яшайди. Уларнинг ўндан зиёд набира ва чеваралари бор.
Жаҳонгир Отажонов
Хонанда Жаҳонгир Отажонов шу кунгача олти марта оила қурган. У саккиз нафар фарзанди борлигини ва уларнинг бари билан яхши алоқада эканлигини айтиб ўтган.
“Олти марта уйланиб, ажрашганман. Биринчи турмушимдан 19 ёшли қизим бор, у ҳозир онаси билан Германияда яшайди. Иккинчи турмушимдан уч нафар фарзандим бор, уларга қарайман. Учинчи турмушимдан бир ўғлим бор, алимент олади. Тўртинчи турмушимдан ҳам бир ўғлим бор, у ҳам алимент олади. Бешинчи турмушимдан бир қизим бор, унга қарайман. Олтинчи турмушимдан бир ўғлим бор, у билан умуман муносабатим йўқ. Гоҳида кўришиб тураман. Ўғлим икки ёш бўлган ҳозир”, — деган эди хонанда интервьюларидан бирида.
Валижон Шамшиев
Сўз устаси Валижон Шамшиев 1998 йилда Ўзбекистон халқ артисти Эркин Комиловнинг Дилфуза исмли қизига уйланган. Уларнинг тўйи икки марта Андижон ва Тошкент шаҳарларида катта дабдаба билан нишонланган. Жуфтлик етти нафар фарзанд кўрган, уларнинг турмуши 20 йил давом этган. Валижон Шамшиев Дилфуза Комилова билан 2018 йилда ажрашган. Шундан сўнг қизиқчи яна бир бор турмуш қурган. Ҳозирда Валижон Шамшиевнинг умумий ҳисобда 12 нафар фарзанди бор.
Ботир Қодиров
Оилада ёлғиз фарзанд бўлган Ботир Қодировнинг 15 та фарзанди бор. Тоғри, уларнинг онаси бир эмас, аммо хонанда фарзандлари бир-бирини яхши таниши ҳақида айтиб ўтган.
— Фарзандларимнинг бари бир-бирини танишади ва дўстона муносабатда бўлишади. Бошқа оиламдан бўлган фарзандларим биринчи оиламга келиб, бемалол ўйнашади. Фарзандларим учун, албатта, вақт ажратаман. Уларнинг барини йиғиб, истироҳат боғига ёки овқатланишга олиб бораман, — деганди хонанда интервьюларининг бирида.
Изоҳ (0)