Андижон вилоятига Хитойдан 100 та электробус харид қилиниши режалаштирилган, деб хабар бермоқда Транспорт вазирлиги.
Қайд этилишича, Андижон вилоятида жамоат транспорти тизимини ривожлантириш, аҳолига қулай ва сифатли транспорт хизматлари кўрсатишни ташкил этиш мақсадида йўловчи ташиш фаолияти билан шуғулланувчи корхоналар ҳаракат таркибини янгилаш масаласига эътибор қаратилмоқда.
Ҳаракат таркибини янги замонавий автобус ва электробуслар билан тўлдириш, шунингдек, Андижон шаҳрида брутто-шартнома тизимини тўлиқ ишга тушириш мақсадида 100 та электробус харид қилиниши режалаштирилган.
Шу муносабат билан Андижон вилояти ҳокимлиги, Андижон вилояти транспорт бошқармаси, “Ўзмиллийбанк” АЖ ҳамда салоҳиятли тадбиркорлардан иборат делегация айни пайтда Хитойда бўлиб турибди.
Делегация аъзолари Lanzhou Guangtong Nev Energy Automobile Co., Ltd ва Guangtong компанияси томонидан электробусларни ишлаб чиқариш жараёни, етказиб бериш хизмати ва бошқа мавзуларда музокаралар ўтказиб шартномалар имзолаш бўйича амалий ишларни олиб бормоқда.
2023 йил октябрида Тошкент ҳокимлиги Хитойнинг BYD автомобиль ишлаб чиқарувчи компанияси билан 2000 та электробус сотиб олиш бўйича рамка шартномасини имзолаганди. 2024 йил октябрида БМТ Тошкентда сотиб олинган электробусларнинг кредитини қоплаш учун миллион доллардан ортиқ маблағ ажратди.
Президент ҳузурида ўтказилган транспорт-логистика тизимини ривожлантириш бўйича тақдимотда 2025 йилда Тошкентга қўшимча 1000 та автобус олиб келиш бўйича топшириқ берилганди.
Шунингдек, Самарқанд шаҳрига ноябрь ойида режалаштирилган 30 та электробусларнинг 8 таси, Сирдарё вилоятининг Гулистон шаҳрига Хитойдан 8 та замонавий автобус олиб келинганди.
Изоҳ (0)