Транспорт вазирлиги Тошкент—Андижон пулли автомобиль йўлини давлат-хусусий шериклик асосида лойиҳалаштириш, қуриш, молиялаштириш, бошқариш ва техник хизмат кўрсатиш лойиҳаси биринчи босқичи бўйича тендер ўтказилишини эълон қилди.
Қайд этилишича, тендер Иқтисодиёт ва молия вазирлиги ҳамда Автомобиль йўллари қўмитаси иштирокида ташкиллаштирилади. Жаҳон банки кўмагида Arup and Partner’s (Буюк Британия), PWC (Ўзбекистон) ва CМS Cameron (Буюк Британия) консултантлар консорсиуми ҳукумат томонидан хусусий шерикни танлашга ёрдам бериш учун лойиҳанинг маслаҳатчиси сифатида жалб қилинган.
Лойиҳанинг 1-босқичи умумий узунлиги 171 километрни ташкил этиб, Тошкентдан Ангренгача бўлган автомобиль йўли ва Қамчиқ довонини лойиҳалаштириш, қуриш, молиялаштириш, бошқариш ва техник хизмат кўрсатишни ўз ичига олади. Лойиҳа концепцияси Вазирлар Маҳкамаси томонидан 2025 йил 21 январда тасдиқланди.
Тендер икки босқичда ўтказилади. Биринчи босқичда хусусий компаниялар дастлабки малакалашдан ўтиш учун ҳужжатларини топширади. Иккинчи босқичда дастлабки саралашдан ўтган компаниялар лойиҳа бўйича техник ва молиявий таклифларини тақдим этади. Тендерда ғолиб бўлган иштирокчи билан узоқ муддатли ДХШ битими имзоланади.
Автомобиль йўллари қўмитаси йўл қурилиш соҳасида ДХШ лойиҳаларида тажрибага эга бўлган барча қизиқувчиларни 2025 йил 21 апрель куни, Тошкент вақти билан соат 18:00 га қадар дастлабки малакани саралаш босқичи учун ҳужжатларини топширишга таклиф этди. Ариза топшириш бўйича кўрсатмалар ва малака талаблари ҳақида батафсил маълумот олиш учун дастлабки малака сўров (RFQ) ҳужжатига мурожаат қилиш лозим.
Лойиҳа маълумотлар базасига кириш, дастлабки малака ҳужжатларини топшириш ҳамда лойиҳа ва РФҚ бўйича ҳар қандай аниқлик киритиш учун қуйидаги почталар орқали “Автомобиль йўллари қўмитаси” ва Arup and Partner’s (Буюк Британия), PWC (Ўзбекистон) ва CМS Cameron (Буюк Британия) консултантлар консорсиуми билан боғланиш лозим:
Тошкент—Андижон пулли йўли
Ўзбекистондаги илк пулли йўлларнинг қурилиши ҳақида 2018 йилда хабар берилганди. Ўшанда бу каби йўлларнинг биринчисини қуриш билан Германия компанияси шуғулланиши мумкинлиги айтилганди. 2019 йилда Ўзбекистондаги илк пулли трассани қуриш учун жой танланди.
2022 йил октябрда Тошкент—Андижон ва Тошкент—Самарқанд пулли автомобиль йўллари 2026 йилгача қуриб битказилиши айтилди. Август ойида транспорт вазири ўринбосари Илҳом Абдугафаров Жаҳон банки ҳамда Европа тикланиш ва тараққиёт банки лойиҳа координаторлари пулли йўлларни қуриш бўйича қонун лойиҳасини ишлаб чиқиш масаласини муҳокама қилганди.
Тошкент—Андижон пулли йўли Тошкент ва бошқа ҳудудларни Фарғона водийси билан боғлашга ёрдам беради. Лойиҳанинг умумий узунлиги 314 километр бўлиб, унинг қиймати 4,65 миллиард долларни ташкил қилади.
Изоҳ (0)