АОКАда 28-сентябр куни ўтказилган брифингда Рақобатни ривожлантириш ва истеъмолчилар ҳуқуқларини ҳимоя қилиш қўмитаси ўтган 8 ой давомида давлат буюртмачилари томонидан ўтказилган 29 минг 98 та танлов (тендер) савдоларида таҳлил ишлари олиб борилгани ҳақида маълумот берди. Таҳлил натижасида буюртмачилар томонидан 8 минг 964 та савдолар жараёнида 12 минг 826 та рақобатга зид ҳаракатлар аниқланган.
Шунингдек, давлат буюртмачилари томонидан давлат харидлари электрон тизимлари орқали амалга оширилган савдоларнинг 18 минг 433 таси қўмита томонидан таҳлил қилинди. Ўрганилган танлов (тендер) савдоларини таҳлили натижасида буюртмачилар томонидан 1 минг 540 та савдолар жараёнида 1 минг 641 та рақобатга зид ҳолатлар аниқланган.
Қўмита ва ҳудудий бошқармаларга юридик ва жисмоний шахслар томонидан давлат харидлари соҳасида 232 та мурожаатлар келиб тушган. Ушбу мурожаатлар асосида ўтказилган таҳлил натижасида 161 та танлов (тендер) савдоларида 275 та рақобатга зид ҳолатлар аниқланган.
Бундан ташқари, қўмита мутахассислари томонидан ҳуқуқ тартибот органлари ва Ҳисоб палатаси билан ҳамкорликда 10 минг 433 та харидлар ўрганилган. Ўрганишлар натижасида 7 минг 263 та савдоларда 10 минг 910 та рақобатга зид ҳолатлар аниқланган.
Қонунбузилишларининг 72,7 фоиз савдолар ўтказишнинг қонун ҳужжатларида белгиланган тартибини бузиш билан боғлиқ бўлса, 27,3 фоизда тил бириктириш орқали келишиб олинган, мувофиқлаштирилган ҳаракатлар ташкил этади.
- Россия экспорт-импорт банкининг кредитлари ҳисобидан “Тошкент метрополитени” ДУК томонидан бошланғич қиймати 8,2 млн долларга тенг бўлган микропроцессор ускуналарини харид қилиш учун ўтказилган тендер ҳужжатларида асоссиз равишда рақобатни чеклашга олиб келадиган талаблар киритилган. Тендер савдолари натижасида қабул қилинган қарор ва шартнома Қўмитанинг кўрсатмасига асосан буюртмачи томонидан бекор қилиниб, тендер савдолари такроран ўтказилган.
- “Ўзбекистон телекоммуникация тармоқларини бошқариш республика маркази” УК томонидан бошланғич қиймати 4,8 млн АҚШ долларга ўтказилган танлов савдолари жараёнида буюртмачи томонидан айрим иштирокчиларга танловда қатнашиш учун имтиёзли шарт-шароитлар яратиб берганлиги аниқланган. Бунда иштирокчи томонидан тақдим қилинган ҳужжатлар буюртмачининг талабларига мос келмасада ғолиб деб эътироф этилган. Танлов натижасида қабул қилинган қарор ва шартнома Қўмитанинг кўрсатмасига асосан буюртмачи томонидан бекор қилиниб, тендер савдолари такроран ўтказилган.
- Соғлиқни сақлаш вазирлиги томонидан бошланғич қиймати 23,6 млрд сўмга “Бирламчи тиббий-санитария ёрдами муассасаларида”тиббий асбоб-ускуналарни харид қилиш бўйича ўтказилган тендер савдосида буюртмачи томонидан баҳолаш мезонларини қўллаш тартиби бузилганлиги аниқланган ушбу қонун бузилиш ҳолатларига келгусида йўл қўймаслик бўйича қўмитанинг қарор кўрсатмаси берилган.
- Буюртмачи Андижон вилояти ягона буюртмачи хизмати инжиниринг компанияси томонидан бошланғич қиймати 8,5 млрд сўмга Балиқчи туманидаги 9-сонли ихтисослаштирилган мактаб интернат биносини мукаммал таъмирлаш бўйича ўтказилган тендерда буюртмачи ва харид комиссия томонидан ғолиб талабгордан юқори балл олган 3 та талабгорлар асоссиз тендердан четлатиб юборилганлиги аниқланган. Ҳолат юзасидан Бош Прокуратурасига маълумот киритилган.
- “Ўзшахарсозлик лити” ДУК томонидан бошланғич қиймати 151,8 млн сўмга “Ўзшахарсозлик лити” ДУКнинг маъмурий биносини алюминий ва пластик витражларини жорий таъмирлаш бўйича 2023 йилнинг март ойида ўтказган энг яхши таклифларни танлаш савдолари жараёнида иштирокчиларга нисбатан ошириб юборилган талаблар қўлланилганлиги аниқланган, яъни Шаффоф тендер электрон тизими учун ишлаб чиқилган бироқ xarid.uzex.uz тизимида қўлланилмайдиган рейтинг тизимидан фойдаланиш оқибатида рақобатни чеклаш аломатлари аниқланган. Ҳолат юзасидан Қўмитанинг ўтказилган танлов савдоси қарорини ва шартномани ҳақиқий эмас деб топиш чораларини кўриш бўйича Қарор ва кўрсатмалари қабул қилинган.
- “Алоқабанк” АТ томонидан бошланғич қиймати 1,2 миллиард сўмга банкга тегишли асосий воситаларни суғурталаш ва баҳолаш бўйича ўтказилган 2 та танлов савдоларида буюртмачи ва иштирокчи ўртасида олдиндан келишиб олганлик аломатлари аниқланган. Ушбу ҳолат юзасидан қўмитанинг қонун бузилиш ҳолатларини бартараф этиш юзасидан тегишли Қарор ва кўрсатмалари қабул қилинган.
- “Ўзбекистон темир йўллари” АЖ томонидан бошланғич қиймати 3,7 млрд сўмга “Ходимларнинг нафақасини баҳолаш бўйича хизматлар (актуар хизматлари)” хариди жараёнида буюртмачи томонидан айрим иштирокчиларга танловда қатнашиш учун имтиёзли шарт-шароитлар яратиб берганлиги аниқланган. Танлов натижасида қабул қилинган қарор ва шартномани ҳақиқий эмас деб топиш чораларини кўриш юзасидан Қўмитанинг қарор ва кўрсатмаси қабул қилинган.
Аниқланган 10 минг 973 та ҳолат юзасидан ҳуқуқни муҳофаза қилиш органларига ва 61 та ҳолат юзасидан Ҳисоб палатасига маълумотномалар тақдим этилган, 151 та ҳолат буюртмачилар томонидан ихтиёрий бартараф этилган, 766 та ҳолат юзасидан ҳудудий бошқармалар томонидан 267 та иш қўзғатилиб, 212 та мансабдор шахслар маъмурий жавобгарликка тортилган, 875 та ҳолат Қўмита томонидан кўриб чиқиш жараёнида.
Изоҳ (0)