2023 йилда давлат буюртмачилари томонидан йўл қўйилган қонун бузилиш ҳолатларининг 70 фоизи савдолар ўтказишнинг қонун ҳужжатларида белгиланган тартибни бузиш билан боғлиқ. Бу ҳақда 11 январь куни Тошкент шаҳрида Рақобатни ривожлантириш ва истеъмолчилар ҳуқуқларини ҳимоя қилиш қўмитаси томонидан ўтказилган матбуот анжуманида маълум қилинди, дея хабар бермоқда “Дарё” мухбири.
Айтилишича, қонун ҳужжатларида белгиланган тартибни бузишга:
- баҳолаш мезонларини белгиламаслик;
- аффилланганлик ҳолатлари;
- нотўғри баҳолаш;
- шартнома тузишни рад этиш;
- манфаатлар тўқнашувини олдини олмаслик каби ҳолатлар киради.
Шунингдек, 30 фоиз ҳолатда савдо иштирокчиларини асоссиз равишда четлаштириш:
- иштирокчиларни асоссиз четлаштириш;
- айрим иштирокчиларга имтиёзли шарт-шароитлар яратиб бериш;
- ҳаддан зиёд юқори техник талаблар белгилаш;
- етказиб бериш муддатларини қисқа белгилаш;
- савдоларнинг предметига технологик ва функсионал жиҳатдан боғлиқ бўлмаган қўшимча хизматларни киритиш кабилар ташкил этади.
Танлов натижаси қўмитанинг кўрсатмасига асосан буюртмачи томонидан бекор қилиниб, такроран ўтказилган йирик тендер савдолари:
“Миллий банк” АЖ томонидан бошланғич қиймати 20,4 миллиард сўмга тенг бўлган “Андижон вилоятидаги банк филиалининг янги биносини қуриш” учун ўтказилган тендер;
Хоразм вилояти Боғот тумани ободонлаштириш бошқармаси томонидан 5 та лотда қиймати 5,6 миллиард сўмга тенг бўлган махсус техникаларни харид қилиш учун ўтказилган танлов;
“Ўрта Чирчиқ ГЕСлар каскади” УК томонидан ўтказилган махсус техник жиҳозлар хариди бўйича бошланғич нархи 3 миллиард 550 миллион сўм бўлган 2 та лот танлови.
Яна бир ҳолатда — Фарғона вилояти 2-сон туманлараро фтизиатрия диспансери томонидан бошланғич қиймати 970 миллион сўм бўлган “Рақамли рентген аппарати флюорография билан” харидларида рақобатни чеклашга олиб келадиган талаблар киритилган. Танлов натижаси Қўмита томонидан қўзғатилган иш доирасида буюртмачи томонидан ихтиёрий бекор қилиниб, савдолар такроран ўтказилган.
Юқорида аниқланган ҳолатлар юзасидан қонун бузилишига йўл қўйган 500 га яқин мансабдор шахслар маъмурий жавобгарликка тортилган.
Изоҳ (0)