Андижон “Саховат” кексалар ва ногиронлиги бўлган шахслар учун интернат уйи 10—17 май кунлари аутсорсинг хизмати учун бошланғич қиймати 714,5 миллион сўмлик тендер ўтказган. “Дарё” мухбири лот ҳужжатларини кўздан кечириш жараёнида шубҳали ҳолатни аниқлади.
Тендерда интернат уйида яшовчи фуқароларга 3 маҳал иссиқ овқат тайёрлаш ва етказиб бериш хизмати ўйналган. Ғолиб корхона 2023 йилнинг 8 ойи давомида ҳар ой қарийб 3000 порция овқат тайёрлаши керак бўлади.
Лотни ютиш учун иккита тадбиркорлик субъекти рақобатлашган:
- “Бизнес Орзу-Мақсад” МЧЖ;
- “Пахтаобод Орзу-Мақсад” МЧЖ.
Комиссия аъзоларининг якуний баҳоларига кўра, тендерни “Бизнес Орзу-Мақсад” ютиб олган. Шартнома суммаси қарийб 710 миллион сўм. “Пахтаобод Орзу-Мақсад” эса захира етказиб берувчи деб белгиланган.
Статистика агентлиги маълумотларига кўра, тендер ғолиби бўлган “Бизнес Орзу-Мақсад“ МЧЖ Андижон вилояти Пахтаобод тумани “Нодирабегим” маҳалласида жойлашган.
Шубҳалиси, тендерда унга рақобат уюштирган “Пахтаобод Орзу-Мақсад” МЧЖнинг юридик манзили ҳам айнан Пахтаобод тумани “Нодирабегим” маҳалласида ҳисобланади.
Бундан ташқари, бу икки тадбиркорлик субъектининг электрон почта манзиллари ҳам бир хил: orzu-maqsad@gmail.com.
Номлари, жойлашув манзиллари, алоқа маълумотлари жуда ҳам ўхшаш бўлган бу икки фирма ўзаро алоқадорми? Уларни бир шахс ёки бир оила бошқарадими? Бу саволларни масъуллар учун очиқ қолдирамиз.
Изоҳ (0)