Andijonda olimpiya va paralimpiya sport turlariga tayyorlash markazi 2022—2025-yillarda 16 ta eng yaxshi taklif tanlash bo‘yicha tanlov o‘tkazgan. Shundan 8 tasida bir-biriga bog‘liq korxonalar g‘olib chiqdi. “Daryo” muxbiri tender hujjatlarini o‘rgandi.
Mebelchilar ovqatlanish xizmatini ko‘rsatmoqchi. Bu — hazil emas
Eng yangisidan boshlaymiz. Markaz shu yilning 13—20-fevral kunlari ovqatlanish xizmatlarini ko‘rsatish bo‘yicha tender o‘tkazdi. Lotning boshlang‘ich qiymati salkam 2,1 milliard so‘mni tashkil etgan.
Unda “Lucky kinder garten” va “Farovon ulkan savdo” MCHJlar raqobatlashgan va “Lucky kinder garten” g‘olib chiqqan. Shartnoma summasi 2 milliard 90 million so‘m. Korxona 2023-yilning iyul oyida tashkil etilgan, faoliyati buyurtmachiga ko‘rsatilganidek, oziq-ovqat emas, balki mebel ishlab chiqarishga mo‘ljallangan. Bundan tashqari, tenderga ilova qilingan hujjatlarda tashkilot o‘z balansida binolar mavjudligini keltirgan bo‘lsa-da, kadastr pasportida keltirib o‘tilgan obyektlarni davreestr.uz portalidan topishning iloji bo‘lmadi.
Kompyuterchimi yoki oshpazlar?
Markazning boshqa tenderlarini ham o‘rgandik va yanada qiziqroq holatga duch keldik. Ma’lum bo‘lishicha, sportchilarni ovqatlantirmoqchi bo‘layotganlar faqat mebelchilar emas, kompyuterchilar ham ayni shu niyatda. Yana ular bu ishni anchadan buyon bajarib kelayotganiga nima deysiz?
Sport markazining oxirgi uch yilda ovqatlanish xizmati bo‘yicha o‘tkazgan 16 ta tenderining 6 tasida g‘olib chiqqan “Best meals ta’minot” MCHJ — kompyuter, periferik uskunalar va dasturiy ta’minot ulgurji savdosiga ixtisoslashgan. Shunday bo‘lsa-da, korxona uch yilda 6,5 milliard so‘mdan ortiq ishni bajarishga ulgurgan.
Ushbu korxona birinchi bor markaz tenderida g‘olib chiqqanida atigi bir oylik edi. Ya’ni, 2022-yilning 23-sentyabr kuni tashkil etilganidan bir oy ham o‘tmay boshqa yo‘nalishdagi katta tenderlarda g‘alaba qozonishni uddalagan. Eng qizig‘i, u barcha tanlovlarda buyurtmachi tashkil etilayotgan narxdan birozgina (5 mingdan 1 milliongacha) arzonroq narx taklif etib, g‘olib chiqadi. Masalan, korxona so‘nggi marotaba 2024-yilning dekabr oyida boshlang‘ich narxi 556 million 339 ming so‘mlik tenderni 460 ming so‘m farq bilan qo‘lga kiritgan.
G‘olib korxonalar begona emas
Statistika agentligi ma’lumotlariga ko‘ra, “Best meals ta’minot” MCHJning ta’sischilari Isakov Xusniddin Srojidinovich va Isomiddinov Jur’atbek Muxiddin o‘g‘li, rahbari esa Maxmudjonov Muhammadali Qodirjon o‘g‘li hisoblanadi.
Muhammadali Mahmudjonov esa markazning yaqindagina o‘tkazgan yirik tenderlarida g‘olib chiqqan “Lucky kinder garten” MCHJning yuz foizlik ulushiga ega. Ya’ni ikkala korxona bir-biriga chambarchas bog‘liq. Buni tenderga taqdim qilingan hujjatlar ham bevosita tasdiqlaydi.
“Daryo” muxbiri holat yuzasidan izoh olish maqsadida Muhammadali Mahmudjonov bilan bog‘landi. U korxona asli egasi boshqalar ekanligini, u nomigagina hujjatda ta’sischi va rahbarligini aytib, egalari o‘zlari bog‘lanishini bildirdi. Biroq hech kim bog‘lanmadi.
So‘z — Korrupsiyaga qarshi kurashish agentligi va boshqa mas’ul idoralarga.
“Daryo” eng qiziqarli tender savdolarini kuzatishda davom etadi.
Izoh (0)