Тошкент шаҳридан Қамчиқ довони орқали Фарғона водийси вилоятларига микроавтобус қатнови ташкил этилади. Бу ҳақда Транспорт вазирлиги хабар қилди.
Қайд этилишича, ушбу қатнов президентнинг 2023 йил 26 апрелдаги “Республиканинг туризм салоҳиятини жадал ривожлантириш ҳамда маҳаллий ва хорижий туристлар сонини янада оширишга доир қўшимча чора-тадбирлар тўғрисида”ги қарорига мувофиқ йўлга қўйилади.
Шу мақсадда 2024 йилнинг 1 майида шаҳарлараро-вилоятлараро йўналишлар бўйича навбатдаги очиқ тендер танловлари бўлиб ўтади.
Тендерга қўйилган лотлар:
- ЙТ – 1150-сонли Тошкент шаҳри—Наманган шаҳри икки томондан;
- ЙТ – 1151-сонли Тошкент шаҳри—Фарғона шаҳри икки томондан;
- ЙТ – 1153-сонли Тошкент шаҳри—Андижон шаҳри икки томондан.
Ушбу йўналишда қатновларни амалга оширишда қуйидаги талаблар мавжуд:
- Қамчиқ довони орқали йўловчиларни ташишда фойдаланиладиган ва ҳайдовчидан ташқари ўн тўрттагача ўриндиққа эга бўлган М2 тоифадаги транспорт воситаларига;
- бунда фақат 1 апрелдан 1 ноябргача бўлган даврда кундузи;
- ишлаб чиқарилганига 3 йилдан ошмаган ва газ баллон ускуналари ўрнатилмаган;
- секинлаштирувчи ускунаси (тоғ тормози) мавжуд бўлган;
- ҳаракатни кузатиш навигация қурилмаси ва тахограф ўрнатилган транспорт воситаларида камида 7 йил стажи бор ҳайдовчиларга автомобиль транспортида йўловчиларни ташиш фаолияти учун лицензия мавжуд бўлган тақдирда қатновни амалга оширишга рухсат берилади.
Тендерга жойлаштирилган йўналишлар ҳақида батафсил маълумотларга эга бўлиш ҳамда тендерда қатнашиш учун таклифларни тақдим этиш жараёнлари e-tender.uztrans.uz веб-сайти орқали амалга оширилади.
Изоҳ (0)