Наманганлик 27 ёшли шахс ўз уйида икки аёлни фоҳишаликка мажбур қилгани учун 5 йилга озодликдан маҳрум қилинган. Ҳодиса тафсилотларини эшитиб ёқа ушлайсан киши. “Дарё” мазкур ҳолатни оммага олиб чиқишдан аввал минг бир истиҳола қилди. Бошқаларни ҳам огоҳликка чақириш, фарзанд неча ёшда бўлмасин, юриш-туришига эътиборли бўлиш лозимлигини билдириш учун ҳам ҳодиса тафсилотларини очиқлаш лозим деб топилди.
Қўшмачилик
Наманганлик Шаҳризод (исм ўзгартирилган) Андижон тиббиёт институтига катта умидлар билан ўқишга киради. Ота-онаси “ўғлим қийналмасин”, деб Андижон шаҳридан уй ҳам олиб беради. Аммо унинг енгилтак аёллар билан муносабати ўқишига ҳам таъсирини кўрсатиб, институтдан ҳайдалиб кетади.
У қўшмачилик қилгани учун 2023 йили биринчи марта маъмурий жавобгарликка тортилади. Жиноят ишлари бўйича Хўжаобод туман судининг 2023 йил 30 мартдаги ҳукми билан Жиноят кодексининг 131-моддаси 1-қисми (ғаразли ёки бошқа паст ниятларда қўшмачилик қилиш) билан айбли деб топилиб, 180 соат мажбурий жамоат ишларига жалб қилинади. Аммо йигит минг бир баҳона билан жазодан бўйин товлаб юргани ортидан суд тайинлаган жазо ўталмай қолади.
Танишув
2021 йили Шаҳризод ёши ўзидан анча катта, бир нафар ногирон фарзанди бор Ойнура (исм ўзгартирилган) билан танишиб қолади. Йигит 2023 йилнинг ноябрида аёл билан қонуний никоҳдан ўтади ва унинг ўғлини оталиққа олади.
Кейинроқ 2024 йилнинг апрель ойида Ойнура ижарага уй излаб юрган Мавжудани (исми ўзгартирилган) ёш боласи билан бирга уйга етаклаб келади. Шаҳризод ёш боласи билан кўчада қолмаслиги учун аёлга уйидан жой беради ва улар биргаликда яшай бошлайди.
Тадбир
2024 йилнинг 1 май куни тунги соат 20:00 ларда ички ишлар ходимларига келиб тушган хабарга кўра, Шаҳризоднинг яшаш уйда тезкор тадбир ўтказилади. Гувоҳлар билан хонадон кўздан кечирилганда Ойнура ва Мавжуда 600 минг сўм эвазига икки нафар эркак билан жинсий алоқа қилишга келишилгани аниқланади.
Ўрганишлар давомида Шаҳризод телефон орқали ўзини Шоҳрух деб таништириб, турмуш ўртоғи Ойнура ва унинг уйида яшаб келаётган Мавжудани зўрлик ишлатиш билан қўрқитиб, жинсий алоқа қилишга мажбур қилиб келгани аён бўлган. Бундан келиб тушган пулларни эса ўзининг шахсий эҳтиёжлари йўлида сарфлаган. Иш ҳужжатлари судга юборилади.
Суддаги кўрсатмалар
Шаҳризод:
— Айбимга қисман иқрорман. Мен Андижон давлат тиббиёт институти талабаси эдим, оилавий шароитим ёмонлашгани ва моддий томондан қийналганим учун ўқишни вақтинчалик тўхтатишга мажбур бўлдим.
Ойнуранинг фарзандини боқиш учун қарамоғимга олгандим. У илгари ҳам пул эвазига жинсий алоқа билан шуғулланиб келган. Унинг ўзи бошқаларга интим хизмат кўрсатиш орқали пул топишни таклиф қилганди. Мижозларни ҳам ўзи топган, пулларни олиш учун мижозлар билан ҳам ўзи учрашарди.
Мавжуда ҳам фоҳиша эди. Фарзанди билан кўчада қолгани учун уни уйимга таклиф қилганман. У Ойнура билан биргаликда танасини сотиб, пул топишни таклиф қилишганди. Ўзлари мижоз топиб, уларни уйга чақиришган.
Мен уларни мажбурламаганман. Улар доимий эркин бўлишган. Бемалол ички ишларга айтиб бериши мумкин эди. Шуларни ҳисобга олиб, суддан менга қонуний енгиллик беришларини сўрайман.
Ойнура:
— Пулга зориқиб қолганимиз учун Шаҳризод пулга бошқа эркаклар билан жинсий алоқада бўлишни, бу пайтда у ҳам ёнимда бўлишини айтганди. Мен бошида рози бўлмадим, лекин Шаҳризод аввалги турмушимдан бўлган ўғлимни биринчи эримга бериб юбориш билан қўрқитди. Шундан кейин бу ишга рози бўлдим.
2024 йилнинг январь ойида бери мени бошқаларга интим хизмат кўрсатишга мажбурлаб келди. Мавжудани ҳам худди шундай мажбурлаб, бегона эркакларга қўшиб келди. Бундан тушган пулларни мижозлардан ўзи олиб сарфлаб келган. Кўчага ҳам мен билан бирга чиқиб келарди. Кимдандир ёрдам сўрашга имконим бўлмасди. Суддан унга қонун доирасида жазо тайинлашини сўрайман.
Мавжуда:
— Шаҳризоднинг уйида яшашни бошлаганимдан бир-икки кун ўтиб, еб-ичиш учун пул беришимни сўради. Мен ишсизлигимни, пулим йўқлигимни айтганимда у менга бегона эркакларга интим хизмат кўрсатиб, пул топишни таклиф қилди. Менда бундан бошқа йўл бўлмагани учун рози бўлдим.
Ойнура билан ички ишларга мурожаат қилиш ҳақида гаплашганмиз. Фарзандимни олиб қўйиш билан таҳдид қилгани учун ҳеч кимга айтолмадим. Суддан унга нисбатан қонуний чора кўришни сўрайман.
Дилзода (исм ўзгартирилган, Шаҳризоднинг онаси):
— Буларни ҳаммасига бизнинг бефарқлигимиз сабаб бўлди. Ўғлимиз эртага шифокор бўлади, ўқиб юрибди, деб ўзимиз билан ўзимиз андармон бўлиб юраверибмиз. Шу бола ижарама-ижара юрмасин, деб уй ҳам олиб берган эдик.
Енгилтабиат, ўзидан ёши катта Ойнурага илакишиб қолиб, ўқишидан ҳам ҳайдалди. Ҳаёти издан чиқиб кетди.
Билишимизча, Ойнура аввал ҳам фоҳишалик қилиб келган. Ўғлим унинг ногирон боласига раҳми келиб, оталиққа олганди. Ҳатто ўз ёнидан операция қилдириб, болани даволатган.
Мавжуда билан Ойнура аввалдан таниш бўлган, улар бу иш билан эскитдан шуғулланиб келишган. Уларни бу ишга ҳеч ким мажбур қилмаган.
Суддан ўғлимга енгиллик беришни сўрайман.
Ҳукм
Суд ҳукмига кўра, Шаҳризод Жиноят кодексининг 135-моддаси — одам савдоси 2-қисми:
а) ўғирлаш, зўрлик ишлатиш ёки зўрлик ишлатиш билан қўрқитиш ёхуд мажбурлашнинг бошқа шаклларини қўллаш орқали;
б) икки ёки ундан ортиқ шахсга нисбатан;
г) айбдорга моддий жиҳатдан ёки бошқа жиҳатдан қарам бўлган шахсга нисбатан;
д) такроран ёки хавфли рецидивист томонидан — бандида назарда тутилган жиноятни содир этганликда айбли деб топилган.
Ўталмай қолган 180 соат мажбурий жамоат ишлари жазосини қисман қўшиб, ўташ учун узил-кесил 5 йил 1 ой озодликдан маҳрум қилиш жазоси тайинланган. Маҳкум жазо муддатини умумий тартибли колонияларда ўташи белгиланган.
Изоҳ (0)