Президентнинг “Ўзбекистон Республикасида 2024–2030 йилларда давлат-хусусий шерикликни ривожлантириш чора-тадбирлари тўғрисида”ги қарори қабул қилинди.
Қарорга кўра, қуйидагилар тасдиқланди:
- 2024–2026 йилларда устувор давлат-хусусий шериклик лойиҳаларини амалга ошириш бўйича чора-тадбирлар;
- 2024–2030 йилларда давлат-хусусий шериклик асосида амалга ошириладиган лойиҳалар дастури.
Бунда:
- йиллик энергия йўқотишларини камида икки баравар пасайтиришни белгилаган ҳолда барча ҳудудларда электр тақсимлаш тармоқларини 2027 йил 1 июлга қадар;
- табиий газ тақсимлаш тармоқларини эса 2027 йил якунига қадар хусусий операторларга топширишни назарда тутувчи шартномаларни имзолаш инобатга олинади.
Қарорда белгиланишича, 2025 йил декабрь ойида Самарқанд вилоятида электр тармоқларини модернизация қилиш ва хусусий операторга ўтказиш бўйича тендер ғолибини эълон қилиш режалаштирилган. Лойиҳа қиймати 250 млн долларга баҳоланмоқда.
Шунингдек, Андижон вилоятида 2027 йилнинг 4-чорагида электр тармоқларини модернизация қилиш, қуриш ва хусусий операторга бериш лойиҳасини амалга ошириш режалаштирилган.
Бундан ташқари, Самарқанд ва Бухоро вилоятларида 2026 ва 2027 йилларнинг 4-чорагида мос равишда газ тақсимлаш тармоқлари бўйича шунга ўхшаш лойиҳалар назарда тутилган.
Қарорда, шу билан бирга, йилига қўшимча 30 фоизгача электр энергиясини тежаш мақсадида 2028 йилга қадар барча маънан эскирган ирригация насос станцияларини модернизация қилиш бўйича келишувлар эришиш белгилаб қўйилган.
Шунингдек, тоза ва доимий ичимлик суви билан таъминлаш қамровини 87 фоизга, марказлашган оқова сув таъминоти қамров даражасини 30 фоизгача оширишни назарда тутган ҳолда 2028 йил якунига қадар ҳар бир ҳудудда ичимлик ва оқова сув тармоқларини модернизация қилиш ва бошқарувга бериш учун хусусий компаниялар жалб қилиниши қайд этилган.
Изоҳ (0)