Президент Шавкат Мирзиёев «Табиий газ назорати ва ҳисобининг автоматлаштирилган тизимини жорий этиш» лойиҳасини амалга оширишга доир қўшимча чора-тадбирлар тўғрисида қарорни имзолади, деб хабар беради ЎзА.
Лойиҳани амалга ошириш доирасида «Ҳудудгазтаъминот» АЖ томонидан маҳаллий ишлаб чиқарувчилар орасида белгиланган тартибда ўтказилган тендер натижаларига мувофиқ «Технопарк» МЧЖ билан электрон газ ҳисоблагичлари ва зарур бўлган ускуналарни етказиб бериш тўғрисида шартнома тузилганлиги маълумот учун қабул қилиниши белгиланган.
Лойиҳани амалга оширишда қуйидаги асосий йўналишлар жадаллаштирилади:
- табиий газ назорати ва ҳисобининг автоматлаштирилган тизимини «ишлаб чиқариш – газ тақсимлаш станцияси – туман (шаҳар) чегараси – йирик участкалар кириш қисми – истеъмолчи» принципи асосида бутун тармоқ бўйича жорий қилиш;
- ҳисоблагичларни биринчи навбатда аҳолининг табиий газ истеъмоли ва қарздорлик даражаси юқори бўлган ҳудудларга ўрнатиш, шунингдек, йирик истеъмолчилар ва тадбиркорлик субъектларини уларнинг ҳисобидан тизимга улаш;
- аҳоли яшаш пунктларида барча истеъмолчиларнинг (маиший, саноат ва бюджет) ҳисоблагичларини ҳамда йирик участкалар кириш қисмидаги ҳисоблагичларни бир вақтнинг ўзида ўрнатиш ва Тизимга улаш ҳамда тармоқдаги йўқотишларни бартараф этиш бўйича ишларни ташкиллаштириш;
- ҳисоблагичларни ўрнатиш ва Тизим имкониятларидан самарали фойдаланиш бўйича амалий машғулотларни ташкил этиш орқали жойлардаги барча ходимларнинг кўникма ва малакасини ошириш.
Тикланиш ва тараққиёт жамғармасидан ажратиладиган кредит маблағлари эвазига 2021 йил 1 февралга қадар Ўрта Чирчиқ, Чиноз, Юқори Чирчиқ, Янгийўл ва Кармана туманлари ҳамда Тошкент, Андижон, Бухоро, Гулистон, Жиззах, Наманган, Нукус, Самарқанд, Термиз, Урганч, Қарши, Каттақўрғон, Қўқон, Марғилон шаҳарларида ва бошқа қарздорлик даражаси баланд бўлган ҳудудларга мазкур тизим ўрнатилади.
Икки ой муддатда йирик истеъмолчилар, автомобилларга газ қуйиш шохобчалари ва қурилиш материаллари ишлаб чиқарувчиларини, 2020 йил якунига қадар қолган тадбиркорлик субъектларини уларнинг ўз маблағлари ҳисобидан ҳамда 2021 йил 1 майга қадар ижтимоий соҳа объектларини Давлат бюджети маблағлари ҳисобидан тизимга уланишини таъминлаш белгиланган.
Лойиҳани молиялаштириш ва 2021 йил 1 августга қадар амалга ошириш учун Тикланиш ва тараққиёт жамғармасининг 1 йиллик имтиёзли даврни ўз ичига олган ҳолда 4 йил муддатда қайтариш шарти билан, 6 ойлик LIBOR plyus 3 фоиз йиллик ставкада, имтиёзли даврда асосий қарз бўйича ҳисобланган фоизлар капитализация қилиниши ҳисобга олиниб, 150 миллион АҚШ доллари миқдоридаги кредити жалб қилинади.
Бундан ташқари, «Ўзсаноатқурилишбанк» АТБнинг 27,5 миллион АҚШ доллари эквиваленти миқдоридаги кредити, электрон газ ҳисоблагичларини йиғиш учун зарур бўлган эҳтиёт қисмларини Италиядан харид қилишга йўналтириладиган Италиянинг СACE давлат экспорт-кредит агентлигининг суғурта қопламаси остида хорижий тижорат банклари кредити, лойиҳанинг маҳаллий харажатларини қоплаш учун биринчи ўринда республика жамғармалари ва маҳаллий тижорат банкларининг маблағлари ва заруратга кўра хорижий молиявий ташкилотлар қарз маблағлари йўналтирилади.
«Ҳудудгазтаъминот» АЖ 2021 йил 1 июнга қадар Тизим билан мувофиқликда ишловчи замонавий биллинг тизими яратиши, «Ўзелтехсаноат» уюшмаси билан биргаликда туман ва шаҳарлар кесимида электрон газ ҳисоблагичлари ўз вақтида етказиб берилишини, шунингдек, ҳар бир ҳудудда ҳисоблагич ва бошқа ускуналарни таъмирлаш ва уларга сервис хизматини кўрсатиш шохобчалари ташкил қилинишини таъминлаши лозим.
Аввалроқ Андижонда «Технопарк» компаниясининг ақлли газ ҳисоблагичи портлагани тўғрисида хабар берилганди. «Ҳудудгазтаъминот» компанияси ушбу ҳолатга изоҳ бериб, тармоқда босим ошиб кетгани сабабли ҳисобга олиш ускунаси бузилган бўлиши мумкинлиги ҳақидаги тахминни рад этганди.
Изоҳ (0)