“O‘z-Hanwоо” ўтказган қарийб 1 миллиард сўмлик тендерда тадбиркор ўзини-ўзи ютди

Андижон вилоятида фаолият олиб борувчи “O‘z-Hanwоо” қўшма корхонаси 8—15 март кунлари Товар-хом ашё биржасида тендер ўтказди. “Дарё” мухбири харид маълумотлари билан танишиш жараёнида шубҳали ҳолатга дуч келди.

Контекст

Автотранспорт воситалари учун бутловчи қисмлар ва аксессуарлар ишлаб чиқариш билан шуғулланувчи “O‘z-Hanwоо” қўшма корхонасининг овоз ўтказмайдиган материалларга мармар ёстиқ етказиб бериш бўйича ўтказган тендери якунланди. Харид лотининг бошланғич нархи 1 миллиард 53 миллион сўм этиб белгиланганди.

Лот маълумотномасига кўра, буюртма қилинаётган махсус ёстиқлар уч хил ўлчамда бўлади. Уларнинг жами сони 520 мингта бўлиб, ўртача нархи 1300 сўмдан 2650 сўмгача баҳоланган.

Протоколда ёзилишича, тендерни ютиш учун иккита МЧЖ рақобатлашган. Улар:

• “Юксак Бизнес Тараққиёти”;
• Асакалик Солижон Авлодлари”.

Комиссия аъзолари уларни 10 та критерия бўйича баҳолаган. Сўнг таклиф этилаётган нархлар билан танишиб, якуний балларни эълон қилган — 100 га 40. “Асакалик Солижон Авлодлари” МЧЖ жуда катта фарқ билан тендер ғолиби деб топилган. Шартнома суммаси эса 933 миллион 400 минг сўм этиб белгиланган. Қизиғи шундаки, “Юксак Бизнес Тараққиёти” МЧЖга 9 та критерия бўйича 1 баллдан берилган, холос.

Бекграунд

Тендер иштирокчиларининг раҳбарияти билан қизиқдик. Очиқ маълумотларга кўра, ғолиб корхона (“А.С.А.”)нинг раҳбари Солиев Соибжон Солиевич ҳисобланади. Устав фонддаги таъсисчилар эса учта бўлиб, Қобулов Ғофуржон Шаҳобиддинович улар ичида энг кўп улушга эгалик қилади.

Шубҳалиси, захира ғолиб “Й.Б.Т.” МЧЖнинг ягона таъсисчиси ва раҳбари ҳам ўша одам — Қобулов Ғофуржон Шаҳобиддинович, “А.С.А“ корхонаси акциядорларидан бири.

Бундан келиб чиқяптики, қарийб 1 миллиард сўмлик тендерда бир одамга тегишли иккита корхона “рақобатлашяпти”, ҳакамлар улардан бирига жуда ҳам шубҳали баллар қўйиб ташлаяпти ва якунда тендернинг интригасиз ўтишига сабаб бўляпти.

Масъуллардан ушбу шубҳали тендерлар натижаларига эътибор қаратишни сўраймиз.