«Дарё» нашри 13 декабрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Япония Иккинчи жаҳон урушидан кейин илк бор энг йирик қуролланиш ҳолатида
Япония АҚШда ишлаб чиқарилган Tomahawk ракеталаридан 500 та атрофида сотиб олмоқда. Бу ҳақда Washington Post газетаси америкалик ва япониялик расмийларга таяниб ёзди.
Токионинг ҳаракатлари Иккинчи жаҳон уруши тугаганидан бери энг йирик қуролланиш деб аталди.Токио ракеталарни миллий хавфсизлик ва мудофаа стратегиясини кўриб чиқиш доирасида сотиб олмоқда. Шу билан бирга, мамлакат ҳукумати мудофаа бюджетини сезиларли даражада — ЯИМнинг 2 фоизигача оширади.
Юзлаб Tomahawk сотиб олиш билан Япония Хитой ва Шимолий Кореяга ҳарбий сигнал юбормоқда, ҳамда Хитойнинг Тайванга бостириб кириши эҳтимоли жиддий эканини билдирмоқда. Агар бу давлатлар Японияга қарши таҳдидлар билан чекланмаса, Tomahawk’нинг учиш масофаси ракеталарга Хитой материги ёки Шимолий Корея ҳудудига етиб бориш имконини беради, деб қайд этди нашр.
Япон элитаси ва жамияти Украинада уруш бошланганидан кейин қуролланиш қарорида янада мустаҳкамланди. Парвоз масофаси 1600 километргача бўлган Tomahawk ракеталари Россиянинг Узоқ Шарқига, мамлакат шимолида ўрнатилган ракеталар эса Шарқий Сибирга етиб бориши мумкин. Tomahawk Япония учун якуний ечим бўлмайди. Токио 10 йил ичида илк бор ўзининг «Тип 12» қанотли ракеталарини олмоқда.
Катта еттилик саммити якунланди. Владимир Зеленскийнинг Украинада тинчлик ўрнатилишини тезлаштириш таклифи ва бунга Россиянинг муносабати
«Катта еттилик» мамлакатлари саммити иштирокчилари 12 декабрь кунги саммит якунида баёнот қабул қилиб, Россия президентининг Украинага бостириб киргани учун жавобгарликка тортилишига, Россия эса етказилган ҳарбий зарар учун товон тўлашига эришишларини маълум қилди.
«Катта еттилик» мамлакатлари бу йўналишда айнан қандай чораларни кўрмоқчи эканига баёнотда аниқлик киритилмаган.
G7 давлатлари, шунингдек, зарурат мавжуд бўлар экан, Украинани ҳар томонлама қўллаб-қувватлашини яна бир марта маълум қилди ва уруш тугатилиши кераклигини — Россия ўт очишни тўхтатиб, бутун Украина ҳудудидан ўз қўшинларини олиб кетиши кераклигини таъкидлади.
Ушбу саммитда Украина президенти Владимир Зеленский ҳам қатнашди ва G7 мамлакатлари етакчиларига мурожаатида «Украинада тинчлик ўрнатилишини тезлаштириш» бўйича ўз режасини таклиф қилди. У Киевга янги турдаги қурол-яроғ етказиб беришни, энергетик ва молиявий кўмакни ҳамда Украина томонидан илгари сурилган 10 бандли «тинчлик формуласи»дан иборат бўлган «янги дипломатия»ни ўз ичига олади.
G7 мамлакатлари саммит якунида Киевга молиявий кўмакни мувофиқлаштириш учун халқаро платформа яратишга қарор қилди. Айни вазиятда Россия президенти матбуот котиби Дмитрий Песков Украинадан Россия қўшинларининг олиб чиқиб кетилиши ҳақида гап ҳам бўлиши мумкин эмаслигини таъкидлаган ва Зеленскийнинг Украинада тинчлик ўрнатиш бўйича таклиф қилган учта қадамни «ҳарбий ҳаракатларни давом эттириш учун уч қадам» деб атаган.
Болтиқбўйи ва қатор Европа давлатлари урушдан кейин Россияга хавфсизлик кафолатлари беришга норозилик эълон қилди
Франция президенти Эммануэль Maкрoннинг Украинадаги урушдан кейин Россияга хавфсизлик кафолатларини бериш ҳақидаги баёнотидан сўнг Болтиқбўйи мамлакатлари ва Европа Иттифоқининг бошқа давлатлари расмий норозилик эълон қилди. Бу ҳақда Reuters хабар берди.
Reuters маълумотларига кўра, Латвия, Литва, Эстония, Словакия ва Польша расман Париж позициясига қарши чиққан.
Ушбу демаршга қанча давлат қўшилгани номаълум, деб таъкидлайди Reuters. Франция, Чехия ва Словакия ташқи ишлар вазирликлари агентлик сўровларига жавоб бермаган, Польша ташқи ишлар вазирлиги эса изоҳ беришдан бош тортган.
Ҳужжат лойиҳаси Чехия республикаси вакиллари томонидан ўтган ҳафта Европа Иттифоқининг бошқа мамлакатлари пойтахтларига топширилган. Reuters хабарига кўра, унда Россия билан Европа хавфсизлиги масалалари бўйича музокаралар ғояси танқид қилинган.
Декабрь ойи бошида Maкрoн Украинадаги уруш тугаганидан сўнг Европа янгиланган хавфсизлик архитектурасини қуриши кераклигини, бу жумладан, Россия учун кафолатлар беришни ҳам ўз ичига олишини айтганди.
Ўзбекистонда суд тизимининг мустақил бўлиши мураккаб жараёнми?
Олий Мажлис Қонунчилик палатаси йиғилишида Суд қарорлари қонунийлиги, асослилиги ва адолатлилигини текшириш институти такомиллаштирилиши муносабати билан Жиноят-процессуал кодексига ўзгартиш ва қўшимчалар киритишга оид қонун лойиҳаси биринчи ўқишда кўриб чиқилди. Бу ҳақда палата ахборот хизмати хабар берди.
Мажлисда Олий суд раисининг ўринбосари Шуҳрат Полвонов мазкур қонунни қабул қилиш зарурати ҳақида гапирди. 2021 йилда Олий суд жиноят ишлари бўйича судлов ҳайъати судьясининг бир ойлик ўртача иш ҳажми 89 тани ташкил қилгани айтилди.
Бунинг оқибатида шикоятдаги важлар ҳар тарафлама текширилмай, иш бўйича якуний қарор қабул қилинмасдан, суд қарори бекор қилиниб, қуйи судларга юбориш ҳолатлари кўпайган. Шу билан бирга, апелляция тартибида кўрилмаган ишларнинг келгусида кассация инстанциясида кўриб бўлмаслиги ҳақидаги қонун талаблари фуқароларнинг эътирозларига сабаб бўлмоқда. Бу каби омиллар эса, соҳани ислоҳ қилиш заруратини келтириб чиқаради.
Олий Мажлис Қонунчилик палатаси спикери Нуриддин Исмоилов судни мустақил бўлиши мураккаб жараён эканини айтди.
Депутатлар, сенаторлар ҳам бутун жамиятимиз судни мустақил бўлиши тарафдоримиз. Президент судлар билан алоҳида учрашди, ҳатто кадрлар билан шуғулланадиган орган тузди. Иккита палатада навбатма навбат ҳар йили судни мустақиллигини таъминловчи комиссия ишлади. Парламент ҳам четда қолмади.
Қанчадан қанча қонунларни қабул қилинди. Лекин бу жуда мураккаб бўлди. Одамлар ҳақиқий мустақил суд бўлишини хоҳлайди. Жумладан, биз ҳам. Шунинг учун мана шу қонун жуда катта аҳамиятга эга. Ҳужжатнинг ҳар бир сўзини эринмасдан кўриб чиқишимиз керак ва уни қабул қилиш жараёнини тезлаштиришимизга тўғри келади», – деган қуйи палата расмийси.
Муҳокамалар якунида қонун лойиҳаси депутатлар томонидан қабул қилинди.
Изоҳ (0)