Britaniya bosh vaziri Ukrainaga qo‘shin joylashtirishga tayyorligini aytdi

Buyuk Britaniya bosh vaziri Kir Starmer uning mamlakati xavfsizlik kafolatlarini ta’minlash uchun Ukrainaga qo‘shin yuborishga tayyorligini aytdi. Bu haqda u The Telegraph nashriga bergan intervyusida ma’lum qildi.

Starmerning so‘zlariga ko‘ra, har yili Britaniya Ukrainani qo‘llab-quvvatlash uchun taxminan 3 milliard funt ajratadi. Bu yordam 2030-yilgacha mo‘ljallangan. U Ukraina uchun xavfsizlik kafolatlarini tezlashtirish bo‘yicha ishlarga o‘z hissasini qo‘shishga tayyorligini ham qo‘shimcha qildi.

Bu, shuningdek, zarurat tug‘ilganda, o‘z qo‘shinlarimizni joylashtirish orqali Ukraina xavfsizligini ta’minlashga hissa qo‘shishga tayyor ekanimiz va istagimizni anglatadi. Bu yengil-yelpi gap emas.

Britaniyalik harbiy xizmatchilarni xavf ostiga qo‘yish mas’uliyatini juda chuqur his etaman. Biroq, Ukraina xavfsizligini ta’minlashga ko‘maklashish qit’amiz va mamlakatimiz xavfsizligini kafolatlashga yordam beradi, dedi Starmer.

Uning ta’kidlashicha, Ukraina xavfsizligini ta’minlash butun qit’ada xavfsizlikni kafolatlashga yordam beradi. Bu Starmerning Ukraina hududiga tinchlikparvar kuchlarni kiritishni ommaviy ravishda va’da qilgan birinchi holatidir. Uning bayonoti 17-fevral kuni Parijda Yevropa yetakchilari bilan bo‘ladigan uchrashuv arafasida yangradi.

Ukraina prezidenti Vladimir Zelenskiy avvalroq mamlakat chegara chizig‘ini nazorat qilish uchun taxminan 100 ming nafar g‘arblik tinchlikparvar kuchlar kerak bo‘lishini aytgandi. Shu bilan birga, Moskva g‘arblik tinchlikparvar kuchlarni Ukraina hududiga kiritish g‘oyasiga qat’iyan qarshi.

AQSH vitse-prezidenti Putin tinchlik kelishuvidan voz kechgan taqdirda Ukrainaga qo‘shin kiritilishi mumkinligini istisno etmagan. 12-fevral kuni AQSH prezidenti Donald Tramp rossiyalik hamkasbi Vladimir Putin bilan telefon orqali suhbatlashdi. Kreml muzokaralar o‘tkazilganini tasdiqladi va Trampni Moskvaga taklif etdi.

Tramp mazkur suhbatdan so‘ng Ukraina prezidentiga ham qo‘ng‘iroq qildi. Zelenskiyning so‘zlariga ko‘ra, tramp suhbatda Putin bilan bo‘lgan muloqotning tafsilotlarini aytib bergan. AQSH prezidenti Ukraina rahbari ham, Putin singari, tinchlik o‘rnatishni istayotganini aytgan.

14-fevral kuni esa Tramp Saudiya Arabistonida Ukrainadagi mojaroni hal etish bo‘yicha muzokaralar o‘tkazilishini ma’lum qildi.