Франция президенти Эммануэль Макроннинг Украинадаги урушдан кейин Россияга хавфсизлик кафолатларини бериш ҳақидаги баёнотидан сўнг Болтиқбўйи мамлакатлари ва Европа Иттифоқининг бошқа давлатлари расмий норозилик эълон қилди. Бу ҳақда Reuters хабар берди.
Reuters маълумотларига кўра, Латвия, Литва, Эстония, Словакия ва Польша расман Париж позициясига қарши чиққан.
Ушбу демаршга қанча давлат қўшилгани номаълум, деб таъкидлайди Reuters. Франция, Чехия ва Словакия ташқи ишлар вазирликлари агентлик сўровларига жавоб бермаган, Польша ташқи ишлар вазирлиги эса изоҳ беришдан бош тортган.
Ҳужжат лойиҳаси Чехия республикаси вакиллари томонидан ўтган ҳафта Европа Иттифоқининг бошқа мамлакатлари пойтахтларига топширилган. Reuters хабарига кўра, унда Россия билан Европа хавфсизлиги масалалари бўйича музокаралар ғояси танқид қилинган.
Декабрь ойи бошида Макрон Украинадаги уруш тугаганидан сўнг Европа янгиланган хавфсизлик архитектурасини қуриши кераклигини, бу жумладан, Россия учун кафолатлар беришни ҳам ўз ичига олишини айтганди.
«Биз эртанги хавфсизлик архитектураси ҳақида ўйлашимиз керак. Гап, хусусан, Россия президенти Владимир Путиннинг НАТО Россия чегараларига яқинлашаётгани ҳақидаги сўзлари тўғрисида кетмоқда. Биз Украинадаги урушдан кейин нима бўлишига тайёргарлик кўриш ва иттифоқчиларимизни қандай ҳимоя қилиш, шу билан бирга Россия музокаралар столига қайтган пайтда унинг хавфсизлиги учун кафолатлар бериш ҳақида ўйлашимиз керак», — деган Макрон.
Айни пайтда G7 саммити иштирокчилари 12 декабрь кунги йиғилиш якунлари бўйича баёнот бериб, Россия президенти Украинага бостириб киргани учун жавобгарликка тортилиши кераклигини, Россия эса уруш оқибатида етказилган зарарни тўлашини таъкидлади.
Изоҳ (0)