Эдуард Саакашвили Deutsche Welle нашрига берган интервьюсида отаси, Грузиянинг учинчи президенти Михаил Саакашвили оғир хасталиги ва ҳаёти хавф остидалигини айтди.
Эдуард Саакашвили отасини охирги марта 2022 йилнинг кузида кўрганини айтди. Шундан кейин у узоқ вақт Грузияда бўлган бўлса-да, отаси билан кўришиш имкони бўлмаганини таъкидлади. Эдуард Саакашвилининг соғлиғидаги ўзгаришларни ОАВ ва яқинлари орқали билган.
“Гап отамнинг ички органлари ишдан чиқиши ҳақида кетмоқда. У деярли икки баравар вазн йўқотди. Унда неврологик муаммолар бор, мия шикастланиши, хатти-ҳаракати ўзгаргани эҳтимоли бор. Яъни уни охирги марта кўрганимда ҳам жуда ёмон аҳволда эди. Энди эса қариндошларимдан унинг аҳволи анча ёмонлашганини билдим. У қаттиқ касал ва ҳаёти хавф остида”, — дейди Эдуард Саакашвили.
У Михаил Саакашвилининг қамоққа олиниши сиёсий қарор эканини айтиб, унинг озод этилиши ёки яна қамоққа олиниши ҳам сиёсий қарор бўлишини билдирди.
Эдуарднинг таъкидлашича, у Грузия ҳукумати “маънавий ва сиёсий нуқтаи назардан тўғри қарор” қабул қиладиган “шароит яратишга” ҳаракат қилмоқда.
“Айни пайтда Европарламент уни озод қилишга даъват этувчи бир қанча резолюцияларни қабул қилди. Европа Иттифоқига аъзо 27 давлат Грузия ҳукуматига отамни даволаниш учун қўйиб юбориш бўйича расмий мурожаат йўллади. Франция президенти Эммануэл Макрон яқинда матбуот анжуманида бу ҳақда гапирди. Европада доимий эътиборнинг мавжудлиги муҳим жараён. Чунки бу Грузия ҳукуматини тўғри қарор қабул қилишга ундайди, деб ўйлайман. Охир-оқибат, улар уни озод қиладими ёки йўқми, Грузия ҳукуматига боғлиқ”, — деди у.
Саакашвилини Грузияда ҳибсга олиш ва қийноқлар
2021 йил 1 октябрда Саакашвили саккиз йил ичида биринчи марта муниципал сайловлар арафасида Грузияга қайтганида ҳибсга олинган. У бир қанча жиноий ишларда, хусусан, 2005 йилда грузиялик собиқ депутат Валерий Гелашвилига ҳужум уюштирганликда айбланмоқда. Бунинг учун у аллақачон сиртдан олти йиллик қамоқ жазосига ҳукм қилинган.
Ҳибсга олингандан сўнг Саакашвили дарҳол очлик эълон қилган ва у 2021 йил 19 ноябрда очликни тўхтатишга рози бўлган. 29 ноябрь куни Саакашвили ҳибсга олинганидан кейин биринчи марта судга олиб борилган ва ҳибсда қийноққа солинганини айтган. У ўзига қўйилган айбловларни сиёсий таъқиб, ўзини эса сиёсий маҳбус деб билади.
Узоқ давом этган очлик эълонидан сўнг сиёсатчининг аҳволи оғирлашган, шу сабабли у Рустав қамоқхонасидан Горидаги ҳарбий госпиталга ўтказилган.
2022 йил декабрида Украина Ташқи ишлар вазирлиги ўша пайтда Тбилисидаги Vivamedи тиббиёт марказида бўлган Саакашвилининг соғлиғи сезиларли даражада ёмонлашганидан чуқур хавотирда эканини билдирган.
2023 йилнинг 1 февралида Украина президенти Владимир Зеленский Грузия ҳукумати Саакашвилини “омма олдида қийноққа солиб, ўлдираётганини” айтди. Саакашвилининг ўзи эса Украинадаги уруш ғалабасигача яшай олмаса, юрагини Киевга дафн этишга чақирди.
Изоҳ (0)