АҚШ президенти Дональд Трамп россиялик ҳамкасби Владимир Путин билан телефон орқали Украинадаги урушни якунлашни муҳокама қилди. Бу ҳақда New York Post хабар берди.
Трамп икки етакчи ўртасидаги суҳбат қанча давом этганини маълум қилмади. АҚШ президенти жанг майдонида ҳарбийларнинг ҳалок бўлиши Путинни “чиндан ҳам ташвишга солаётгани”ни таъкидлади.
“У одамларнинг ўлими тўхташини хоҳлайди”, деб айтди Трамп ва Путин можаронинг яқин келажакда якунланишини исташига ишонч билдирди.
АҚШ президенти урушни тугатишга ёрдам берадиган “аниқ режаси” борлигини айтиб, тафсилотларни келтирмади. “Украинада шундай даҳшатли уруш кечмоқда. Мен буни тугатмоқчиман”, деди у ва миллий хавфсизлик бўйича маслаҳатчи Майк Уолцни можарони ҳал қилишга эътибор қаратишга чақирди.
“Келинг, бу учрашувларни ўтказайлик. Улар учрашишмоқчи. Ҳар куни одамлар ҳалок бўлмоқда. Ёш, келишган аскарлар жон бермоқда. Ўғилларимга ўхшаган навқирон йигитлар қурбон бўлмоқда”, деди АҚШ раҳбари.
Сиёсатчининг яна таъкидлашича, 2022 йилда президент бўлганида уруш содир бўлмаган бўларди.
“Мен ҳар доим Путин билан яхши муносабатда бўлганман. Байден мамлакатимиз учун шармандалик эди. Бутунлай шармандалик”, деди АҚШ президенти.
Аввалроқ у келаси ҳафта Украина президенти Владимир Зеленский билан учрашиб, Украинадаги урушни муҳокама қилиши мумкинлигини айтганди.
Хавфсизлик кафолатлари эвазига Украина ресурсларидан фойдаланиш
Трампнинг сўзларига кўра, у Зеленский билан Россия билан бўлажак тинчлик шартномасида хавфсизлик кафолатлари эвазига америкалик инвесторларга Украинадаги нодир металлар конлари ва газ конларига кириш ҳуқуқини бериш бўйича 500 миллион долларлик келишув тузмоқчи.
Ғарбга Украинада фойдали қазилмаларни қазиб олиш ҳуқуқини бериш ҳақида Зеленский 2024 йил кузида АҚШ президентлигига ўша пайтдаги номзодлар Дональд Трамп ва Камала Ҳаррисга тақдим этган “ғалаба режаси”да ҳам айтилган.
3 февраль куни Трамп бу вариант ҳақида яна гапира бошлади, бу Ғарб сиёсатчилари ва оммавий ахборот воситаларида катта шов-шувга сабаб бўлди. 7 февраль куни Зеленский Reuters агентлигига берган интервьюсида АҚШ Украина табиий ресурсларини ўзлаштиришда устуворликка эга бўлишини, чунки “америкаликлар ҳаммадан кўпроқ ёрдам берганини” айтди.
Изоҳ (0)