Ўзбекистон бош вазирининг ўринбосари Сардор Умурзоқов ва Қирғизистон бош вазирининг ўринбосари Эркин Асрандиев ўртасида 2020 йилнинг 3 сентябрь куни видеоконференция шаклида музокаралар бўлиб ўтди, дея хабар бермоқда Инвестициялар ва ташқи савдо вазирлиги.
Қайд этилишича, музокаралар чоғида икки мамлакат ўртасидаги инвестиция, савдо ва транспорт-логистика соҳаларида шерикликни кенгайтириш истиқболлари кўриб чиқилди ва ўзаро манфаатли ҳамкорликнинг аниқ мақсадлари белгиланди.
Инвестиция шериклигини фаоллаштириш ва саноат кооперациясини кенгайтириш бўйича келгусидаги чоралар тўғрисида конструктив фикр алмашилиб, томонлар Ўзбекистон билан Қирғизистон ўртасида саноат кооперацияси соҳасидаги ҳамкорликни кенгайтириш ва чуқурлаштириш бўйича «Йўл харитаси»ни биргаликда ишлаб чиқиш ва тасдиқлаш ҳамда амалга оширилишини бошлашга келишиб олди.
Томонлар савдо соҳасида тўхталиб, савдо айланмаси ўсишининг ижобий динамикасини қайд этдилар: сўнгги уч йилда савдо айланмаси қарийб беш баравар ўсиб, 2019 йилда 818,4 миллион долларни ташкил этди. Ушбу йўналишда яқин вақтларда ўзаро савдо ҳажмини 1 миллиард долларга етказиш мақсадида пандемиянинг салбий таъсирини бартараф этиш бўйича биргаликда чоралар кўриш тўғрисида келишувга эришилди.
Шунингдек, музокаралар давомида савдо-иқтисодий ҳамкорлик бўйича Ўзбекистон—Қирғизистон ҳукуматлараро комиссиясининг навбатдаги йиғилишини ўтказиш билан боғлиқ бир қатор масалалар ишлаб чиқилди.
Музокаралар давомида транспорт соҳасида ўзаро ҳамкорлик масалаларига алоҳида эътибор қаратилди. Ўтган йил якунлари бўйича икки мамлакат ўртасидаги темир йўл орқали юк ташиш ҳажми 10,7 фоизга ўсиб, 1,47 миллион тоннани, автомобиль юк ташиш ҳажми эса 38,2 фоизга ўсиб, 1,49 миллион тоннани ташкил этганлиги қайд этилди. Томонлар юк ташишга сарфланадиган вақтнинг сезиларли даражада камайишига ва ташувчиларнинг транспорт харажатларини оптималлаштиришга имкон яратган Андижон—Ўш—Иркиштом—Қошғар участкасида автотранспорт воситаларидан фойдаланган ҳолда Ўзбекистон—Қирғизистон—Хитой йўлаги бўйлаб мультимодал юк ташишлари ишга туширилганлигини таъкидлади.
Ушбу йўналишдаги мавжуд салоҳиятни ҳисобга олган ҳолда чегара назорат пунктларидаги йўлларнинг ўтказиш имкониятларини кенгайтириш ва йўловчилар, транспорт воситалари ва юкларнинг транзити учун шароитларни яхшилаш, жумладан, божхона, санитария, транспорт ва чегара назорати жараёнларини рақамлаштириш орқали биргаликда чораларни амалга ошириш истиқболлари қайд этилди. Шу нуқтайи назардан комбинациялашган юк ташишларни ташкил этиш мақсадида қўшма логистика хабларини яратиш имкониятлари муҳокама қилинди.
Музокаралар якунида икки мамлакатнинг тегишли вазирлик ва идоралари раҳбарлари даражасида инвестиция, савдо, транспорт-логистика ҳамкорлиги масалаларининг тезкор равишда келишиш бўйича механизмларини жорий этиш тўғрисида келишувга эришилди, бу эса белгиланган йўналишлар доирасидаги ўзаро амалий фаолият самарадорлигини ошириши таъкидланди.
Изоҳ (0)