Покистон ҳукумати мамлакат ҳудудида бўлган барча ноқонуний афғон муҳожирларини мамлакатдан чиқариб юбормоқчи. Бу ҳақда Афғонистоннинг Исломободдаги элчихонаси хабар берди.
Хабарга кўра, Покистон пойтахти Исломобод ва Равалпинди шаҳарларида сўнгги пайтларда афғон фуқаролари қўлга олиниб, тинтув қилинмоқда ва бу икки шаҳардан чиқиб кетиш бўйича кўрсатма берилган.
Афғонистон фуқароларини қўлга олиш жараёни ҳеч қандай расмий хабарномаларсиз амалга оширилмоқда. Афғонистоннинг Исломободдаги элчихонаси ёзишмалар орқали ҳеч қандай расмий хабар олмаган, дейилади хабарда.
Қайд этилишича, Афғонистон элчихонаси вакиллари ушбу хатти-ҳаракатлар “якка ҳодисалар” ёки “очиқ эълон қилиниши керак бўлган расмий сиёсатнинг бир қисми” эканлигини аниқлаш учун Покистон расмийлари билан бир неча бор учрашувлар ўтказган. Дипломатик ваколатхона, шунингдек, Бирлашган Миллатлар Ташкилотининг Қочоқлар бўйича Олий комиссари бошқармаси (UNHCR) бу жараёндан хабардор эмаслигини таъкидлади.
Якунда Покистон ТИВ вакиллари нафақат Исломобод ва Равалпиндидан, балки яқин келажакда бутун мамлакатдан барча афғон қочқинларини депортация қилиш бўйича аниқ ва якуний режа мавжудлигини тасдиқлади, дейилади хабарда.
Шу билан бирга, Покистон расмийлари ушбу ташаббуслар ҳукуматнинг расмий қарори эканлигини маълум қилди. Расмийларга кўра, амалдаги визаларга эга бўлган афғонларга Исломобод ва Равалпиндида яшашга рухсат берилади.
Маълум қилинишича, элчихона Афғонистон фуқароларини мамлакатга муносиб қайтариш масаласи устида ишламоқда, шунингдек, ўз ҳукуматини юзага келган вазият ҳақида хабардор қилган.
Репатриация 2023 йил октябрь ойида бошланган
БМТ Қочқинлар бўйича олий комиссари бошқармаси маълумотларига кўра, Покистонда 1 миллион 340 мингга яқин афғон қочқинлари ва 468 800 нафар ноқонуний афғон муҳожирлари бор. 2023 йилдан буён 820 мингдан ортиқ афғон қочқинлари ўз ватанига қайтди.
2021 йил август ойида Афғонистонда ҳокимият алмашганидан сўнг Кобул ва Исломобод ўртасида асосан хавфсизлик билан боғлиқ келишмовчиликлар юзага келди.
Хусусан, Исломобод маъмурияти Кобулни Покистоннинг “Теҳрик-e Толибон” (ТТП) жангариларига нисбатан ҳаракатсизликда айбламоқда, Афғонистон маъмурияти эса Исломободнинг бу айбловларини рад этиб, буни Кобулнинг Покистондаги хавфсизлик муаммоларига ҳеч қандай алоқаси йўқлиги билан изоҳламоқда.
Маълум қилинишича, Покистоннинг ноқонуний муҳожирларни жўнатиш тўғрисидаги қарори Афғонистон маъмуриятига сиёсий босим ва мамлакат иқтисодиёти учун салбий оқибатлар таъсирида қабул қилинган.
Изоҳ (0)