Афғонистон ташқи ишлар вазири Ҳаниф Атмар 28 август куни амалий ташриф билан Тошкентга келгани хабар берилган эди. Ташриф давомида Ҳаниф Атмар куни Бош вазир ўринбосари — инвестициялар ва ташқи савдо вазири Сардор Умурзоқов билан учрашув ўтказди.
Вазирлик матбуот хизматининг маълум қилишича, учрашувда икки мамлакат ўртасидаги савдо-иқтисодий, инвестиция, транспорт ва логистика ҳамкорлигининг долзарб масалалари, шунингдек, Афғонистонда энергетика, темир йўллар қурилиши, савдо ва инфратузилмани ривожлантириш соҳаларида қўшма лойиҳаларни амалга ошириш масалалари муҳокама қилинди.
Хусусан, Сурхон – Пули-Хумри электр узатиш линияси қурилишини жадаллаштириш ва тегишли битим лойиҳаси устида ишлаш, шунингдек, Халқаро автотранспорт бўйича битим лойиҳасини имзолашга тайёрлаш доирасида эксперт музокараларини ўтказиш масалалари муҳокама қилинди.
Темир йўл транспорти соҳасида қўшма лойиҳаларни амалга ошириш орқали транспорт йўлакларини ривожлантиришда ҳамкорликни мустаҳкамлашга алоҳида эътибор қаратилди.
Савдо айланмасини ошириш, жумладан, трансчегаравий савдони кенгайтириш ва иккала мамлакат бозорларига харидоргир қишлоқ хўжалиги ва саноат маҳсулотларини етказиб беришни ташкил этиш мақсадида тегишли инфратузилмани ривожлантириш учун шарт-шароитлар яратиш бўйича қўшимча чора-тадбирлар кўриш тўғрисида келишувга эришилди.
Учрашув якунида «Ўзбекистон миллий электр тармоқлари» АЖ ва Афғонистоннинг Da Afghanistan Breshna Sherkat компанияси (DABS) ўртасида 10 йил муддатга электр энергиясини етказиб бериш тўғрисида битим имзоланди.
Эсалтиб ўтамиз, июль ойида Ўзбекистон ТИВ Афғонистонда Қурбон ҳайити муносабати билан уч кунлик сулҳ эълон қилинганини олқишлаган, шунингдек, афғонлараро инклузив музокаралар олиб бориш учун 400 нафар «Толибон» аъзосининг озод қилинганини ижобий баҳолаганди.
Аввал Афғонистоннинг Мозори-Шариф шаҳри яқинидаги темир йўл қўриқчиларига ҳужум уюштирилгани, ҳужум оқибатида жароҳатланган ўзбекистонлик — «Сўғдиёна транс» корхонасининг координация бўлими бошлиғи ўринбосари Термиз шаҳридаги касалхонада даволанаётгани хабар қилинганди.
Ўзбекистон ташқи ишлар вазири Абдулазиз Комилов афғонистонлик ҳамкасби билан боғланиб, мамлакатда фаолият юритаётган Ўзбекистон компаниялари ва корхоналари ходимлари учун хавфсизлик чоралари кучайтирилишини сўраган.
Изоҳ (0)