“Толибон” Бирлашган Миллатлари Ташкилотининг афғон ходимларига соқол ўстиришни буюрди. Бу ҳақда манбаларга таяниб, Аmu TV хабар берди.
Манбаларга кўра, “Толибон” расмийлари 8 февраль куни Ҳиротдаги Ислом Қалъа марказига ташриф буюриб, эркак ходимларни соқол олдириш ёки қисқартириш қамоқ жазосига олиб келиши ҳақида огоҳлантирган. Огоҳлантириш Афғонистондаги гуманитар операциялар учун қийинчиликлар ортиб бораётган бир пайтда эълон қилинди.
2023 йил апрель ойида эса “Толибон” аёлларга БМТ ташкилотида ишлашни тақиқлаган эди. Мазкур қийинчиликлар фонида 72 та инсонпарварлик лойиҳаси тўхтатилган, иккита ташаббус бутунлай бекор қилинган ва битта муассаса ёпилди.
2021 йилда “Толибон” ҳокимиятга келиши билан Афғонистонда эркакларга соқол олишни тақиқлаган. Тегишли баёнотида сартарошхона ва жамоат ҳаммомларида соқол олиш ҳамда мусиқа чалиш қатъиян тақиқланиши айтилган.
“Агар сартарошхона ёки умумий ҳаммомда кимдир соқолини олдиргани ёки у ерда мусиқа чалгани аниқланса, айбдорларга нисбатан шариат қонунларига мувофиқ иш кўрилади ва уларнинг шикоят қилишга ҳаққи бўлмайди”, дейилган баёнотда.
2023 йил Афғонистонда соқол ўстириш буйруғига бўйсунмаган ва шу билан ислом қонунларига риоя этмаган 280 дан ортиқ полициячи ишдан бўшатилган. Шу йили “Толибон” ўқитувчиларнинг соқоли йўқлиги учун иккита мактабни ёпган. Мактабларни ёпиш тўғрисидаги қарорнинг яна бир сабаби ўқитувчиларнинг ҳижоб ўраш меъёрларига риоя қилмагани ҳам бўлиши мумкин.
Изоҳ (0)