Эрини президент қилмоқчи бўлган: Анжелина Жоли ва Бред Питт никоҳининг бузилишига аслида нима сабаб бўлган? 

Уларни “Голливуддаги энг гўзал жуфтлик” деб аташган — кўпчилик Анжелина Жоли ва Бред Питт яратишга муваффақ бўлган оилавий эртакка ҳавас қилган: кўп болалар, хайрия, барча соҳаларда муваффақиятлар. Бу ўн йилдан ортиқ давом этди. Аммо бир куни бу эртак ўз ниҳоясига етди.

2016 йилнинг кузида Анжелина ажрашиш учун ариза берди. Бу мухлисларни ҳайратда қолдирди. Ўшандан бери орадан йиллар ўтди, аммо жамоатчилик тинчимаяпти: ҳалигача айрилиқнинг асосий сабаби миш-мишлар ва тахминлар билан тўлиб-тошган.

Турли хилма-хилликлар

Анжелина ва Бред “Жаноб Смит ва Смит хоним” фильмининг суратга олиш жараёнида танишган. Шундан сўнг улар бир-бирига кўнгил қўйиб, турмуш қуришга қарор қилишади.

Аммо улар ўзларининг хилма-хил эканликларини ҳисобга олмагандилар. Анжелина болалигиданоқ ўзини атрофдагиларга бегона ҳис қиларди. Бу уни исёнкор бўлишга ундарди. Бундан ташқари, у отасининг ёнида эмаслигидан қийналарди. Унга жуда ҳам ишончли ва кучли эркак етишмасди.

Бред эса ёшлигидан анъанавий ва диндор оиладан чиққан “тилла бола” имижи билан курашарди. У актёрликда ўзини намоён қилишни жуда хоҳлаган, бу эса ота-онасидан узоқда мустақил ҳаёт кечиришни талаб қиларди. Унинг учун кучли эркак сифатида тан олиниши муҳим эди. Албатта, улар бир-бирини тўлдирарди. Аммо қарама-қаршиликлар кучлироқ чиқди.

Никоҳ шартномаси

Юлдузлар турмуш қуришдан олдин никоҳ шартномаси тузишган. Унинг кўплаб бандлари қатъийлиги ва муросасизлиги билан кишини ҳайратга солади. Айниқса, эр-хотин хиёнат қилган тақдирда Бред болаларига васийлик қилишдан маҳрум бўлади. Анжелина, ҳар доим ташлаб кетилишидан қўрққан ҳолда, эрини манипуляция қилиш имкониятини берувчи бандни ҳужжатга қўшган.

Барча эркакларга нисбатан ишончсизлик

Анжелина Жоли эндигина бир ёшга тўлганида отаси уларни ташлаб кетган, жуда кичик бўлгани учун у отасининг хиёнатлари ва онаси билан муаммолари ҳақида билмасди. Онаси бу ҳақда қизчага доимий равишда айтиб, кундан-кунга эркакларга нисбатан салбий муносабатни шакллантиради. Натижада Жоли ҳеч бир эркакка ишониб бўлмайди, деган фикр билан улғаяди. Шу фикр билан у Бред Питтга турмушга чиқади.

Хайрия ишлари

Маълумки, Жоли ва Питт ўзларининг уч фарзандидан ташқари яна уч болани асраб олган. Фарзандликка олиш Анжелина учун ҳаётини олижаноб вазифа билан тўлдириш, ўзини ҳам, атрофдагиларни ҳам жамиятнинг муносиб аъзоси эканлигига ишонтириш йўлига айланди. Эҳтимол, бу унинг оғир неврозлари, тушкунлиги ва ўз жонига қасд қилишга уринишлари оқибатларининг намоён бўлиш шаклидир.

Фарзандликка олиш ташаббуси ҳар сафар Анжелинадан чиқарди. У қўлидан келганча “дунёни қутқарар”, эри эса бу пайтда хайрия ишларининг унга ҳаводек зарурлигини тушуниб, Анжелинанинг ўзини асраб-авайларди.

Баҳс ва низолар

Аммо уларнинг тортишувларини атрофдагилар ҳам эшитарди, ҳатто ўзлари ҳам тез-тез умумий тил топиша олмаётганликларини оммадан яширмаган. Масалан, катта қизи Шайлонинг туғилган куни учун совға танлашда улар узоқ вақт ўйинчоқ жип қандай бўлиши кераклиги ҳақида баҳслашишган. Анжелина совғанинг энг муҳим жиҳати – хавфсизлик ва ишончлилик бўлиши кераклигини таъкидлаган бўлса, Бред қизини хурсанд қилиш учун фақат пушти рангдаги машина олишни хоҳлаган.

Ичкиликбозлик

Бред Питт тан олганидек, уларнинг ажралишига сабаб бўлган омиллардан бири унинг спиртли ичимликка ружу қўйгани эди. Бир пайтлар актёр ҳар куни ичган. Болаларидан ажралишига бу зарарли одат сабаб бўлиши мумкинлигини англаган Питт ичкиликбозликдан даволаниш курсига боради, сўнгра узоқ вақт малакали руҳшунос назоратида бўлади.

Ўз-ўзини йўқ қилиш истаги

Дарвоқе, Анжелинанинг ҳаётида ҳам ғалати дамлар кўп бўлган. Ҳеч бўлмаганда, унинг болалигидан ўзига хос бўлган ўз-ўзини йўқ қилишга бўлган иштиёқини олайлик. Ўшанда у тез-тез ўзини пичоқ билан жароҳатларди, улғайгач эса татуировкаларга қизиқа бошлайди.

Чамаси, азоб-уқубатга интилиш Анжелинани ҳамон тарк этмаяпти. Унинг электрон почтасига ҳар куни аёлларга қарши содир этилаётган жиноятлар ҳақидаги хабарлар келиб туради ва у бу маълумотлардан ўзининг хайрия фаолиятида фойдаланади. Жоли тез-тез қочқинлар лагерларига ташриф буюради, баъзида у ерга болаларини ҳам олиб боради, уларни хавф остига қўяди. Шубҳасиз, буларнинг барчаси Бред Питтга маъқул келмаган, аммо у узоқ вақт давомида рафиқасининг хоҳишларига бўйсуниб келган. Бироқ бу ҳолат абадий давом этиши мумкин эмасди.

Сиёсий карьера

Бир куни Анжелина эрининг сиёсий карьерасини “ривожлантириш”га қарор қилади. У келажакда Бред Питтни президент сифатида кўришини яширмаган. Аммо Бред сиёсатга аралашишни рад этади, бу унинг хотинига кутилмаган хабар бўлади. У хайрия ишларида Анжелинани қўллаб-қувватлаган, лекин рафиқасининг янги ғояси унга “жуда” оғир бўлиб туюлади. У фақат актёр бўлиб қолишни хоҳларди.

Афтидан, айнан шу келишмовчилик ҳал қилувчи аҳамиятга эга бўлди. Анжелина турмуш ўртоғидан кўнгли қолди — эру унинг умидларини оқламади. Эҳтимол, айнан шу лаҳзадан бошлаб уларнинг муҳаббат қиссасига нуқта қўйилгандир. Бироқ буларнинг барчаси шунчаки тахминлар холос. Жолининг ўзи Питт билан ажрашиш сабабини тушунтирар экан, “болалар фаровонлиги”ни рўкач қилади. Бу иборани эса ҳар ким ўзича талқин қилиши мумкин.