“Болаларим 18 ёшга тўлиши биланоқ АҚШдан кетишим мумкин”. Анжелина Жоли қаерга кўчиб ўтиши ҳақида маълум қилди

Таниқли америкалик актриса Анжелина Жоли АҚШдаги ҳаёти ва Голливуддаги ишидан нолиди. Актриса қаерга кўчиб ўтишни режалаштираётганини ошкор қилди.

Жоли бутун умрини Лос-Анжелесда ўтказди. Бироқ актрисанинг айтишича, энди у бу ерда яшай олмайди. Гап шундаки, унинг шахсий ҳаёти тобора оммалашиб бормоқда ва унга бундай яшаш қийин — Голливудда айтилган ҳар қандай сўз унга қарши ишлатилиши мумкин.

Юлдуз Тhе Hollywood Reporter нашрига берган интервьюсида айтишича, 6 нафар фарзанди вояга етгач, у Камбожага кўчиб ўтмоқчи. 2005 йилда у ушбу мамлакат фуқаролигини олган — унинг асраб олган ўғли камбожалик.

Маълумки, Жоли карьерасида 5 йил танаффус олганди. Унинг сўзларига кўра, бу болаларни тарбиялаш учун мажбурий қарор эди. Яқинда актриса “Мария” фильмида бош ролни ўйнади. Фарзандлари улғайган, энди улар оналари билан суратга олиш майдончасида вақт ўтказишлари, хизмат сафарларига боришлари мумкин.

“Фарзандларим улғайиб, мустақил бўлиб бормоқда. Улар менга камроқ муҳтож ва хоҳлаган вақтларида кетишлари мумкин. Бу бизнинг ҳаётимизда янги давр. Мен бундан жуда хурсандман. Ҳозир ажрашаётганим сабабли Лос Анжелесда бўлишга мажбурман, лекин болаларим 18 ёшга тўлиши биланоқ бу ердан кетишим мумкин. Кўпроқ вақтимни Камбожада ўтказмоқчиман, лекин болаларим дунёнинг қайси бурчагида бўлмасин, уларни кўришга бориб тураман”, дейди юлдуз.

Бундан ташқари, Жоли карьераси қандай бошланганини эслаб, оиласидаги оғир молиявий аҳвол уни актриса бўлишга мажбур қилганини тан олди. Ўшанда у жаҳон миқёсидаги юлдузга айланишини хаёлига ҳам келтирмаган.

“Мен онамга тўловларни тўлашда ёрдам бериш учун актриса бўлганман. Актриса бўлиш менга жуда ёққан пайтлар бўлган, лекин шундай вақтлар ҳам бўлганки, шоу-бизнесда ўзимни қулай ҳис қилмаганман. Умид қиламанки, Голливуд билан янги муносабатлар ўрната оламан”, дейди Жоли.