4 июнь куни америкалик кино, телевидение ва овоз актрисаси, кинорежиссёр, продюсер, БМТнинг эзгулик элчиси ва шунчаки мафтункор аёл Анжелина Жоли ўзининг туғилган кунини нишонлади.
49 ёшли Жоли кино фаолияти давомида “Оскар” мукофоти, уч карра “Олтин глобус” (тарихда уч йил кетма-кет ушбу мукофотни қўлга киритган биринчи актриса) ва икки карра “АҚШ актёрлар кино гилдияси” мукофотини қўлга киритди. Forbes нашри маълумотларига кўра, 2009, 2011 ва 2013 йилларда Жоли Голливуддаги энг кўп маош олувчи актриса деб топилган.
Актриса дебютини 1982 йилда “Чиқиш йўлини излаб” комедиясида бошлаган. Жолига “Лара Крофт: Даҳма талончиси” ва “Лара Крофт: Даҳма талончиси-2. Ҳаёт беланчаги” фильмларида илк машҳурлик ва шон-шуҳрат олиб келди. Қуйида биз Анжелина Жоли иштирокидаги кино саноатида энг кассабоп лойиҳаларга айланган фильмларни ёдга оламиз.
“Малефисента”
Режиссёр Робрт Стромберг томонидан суратга олинган фентези фильм Disney’нинг “Уйқудаги гўзал” мультфильмининг ремейки саналади. Фильмдаги асосий антагонист — Малефисента нима учун ёш ва эзгу паридан қасоскор ва жаҳлдор сеҳргарга айлангани ҳақида сўз боради. Фильмининг премьераси 2014 йил 28 май куни бўлиб ўтди ва глобал кассадаги умумий даромади 500 миллион доллардан ошди.
“Жаноб Смит ва Смит хоним”
Режиссёр Даг Лайман томонидан суратга олинган комедия йўналишидаги фильм турли мижозлар учун ишлайдиган ва бир вақтнинг ўзида бир-бирини йўқ қилиш вазифаси юкланган эр-хотин агентлар ҳақидадир. Комедияни суратга олиш майдончасида Голливудда энг кўп муҳокама қилинадиган жуфтлик пайдо бўлган: Бред Питт Женнифер Энистон билан ажрашиб, Анжелина Жолига уйланган. Лойиҳа кассада 480 миллион доллар тўплаган ва ҳанузгача севиб томоша қилинади.
“Ўта хавфли”
Россиялик режиссёр Тимур Бекмамбетов томонидан Жеймс Макавой, Морган Фриман ва Анжелина Жоли иштирок этган жанговар фильм премьераси 2008 йилда бўлиб ўтган. Сюжетга кўра, бош қаҳрамон Уэсли Гибсоннинг ҳаёти омадсизлик ва муваффақиятсизликка тўла бўлади. Гибсон болалигида уни ташлаб кетган отасининг шафқатсизларча ўлдирилганини билиб қолгач, ҳаммаси ўзгаради. Энди у ёлланма қотилларнинг яширин жамиятига жалб қилиниб, у ерда тажрибали мураббийлардан дарс олади ва оддий офис ходими бўлган Уэсли ажойиб рефлексларга ва ғайритабиий кучга эга профессионал жангчига айланади.
“Сайёҳ”
“Оскар” мукофотига сазовор бўлган фильм режиссёр Флориан Хенкел фон Доннерсмаркнинг эстетик жиҳатдан мукаммал фильми. Суратга олиш ишлари 2010 йилда Париж ва Венецияда бўлиб ўтган. Бош ролларда Анжелина Жоли билан бирга Жонни Депп ҳам иштирок этган.
“Солт”
Режиссёр Филлип Нойс томонидан суратга олинган жанговар фильм сценарийси Курт Виммер ва Брайан Хелгеланд томонидан ёзилган. Сюжет аввалида Шимолий Корея қамоқхонасида Эвелин Солт Россия разведкасига тегишли эканлигини тан олиш учун шафқатсизларча сўроқ қилинади. Кутилмаганда, уни озод қилишади ва машҳур арахнолог Майкл Краузенинг саъй-ҳаракатлари билан озод қилинганини билиб қолади. Майкл кейинчалик Эвелин билан турмуш қуради. Уларни олдинда кўплаб машаққатлар кутиб туради. Фильм премьераси 2010 йил 23 июлда бўлиб ўтган.
Изоҳ (0)