Россияда мигрантларга патент тизимини бекор қилиш, унинг ўрнига ишлаш учун рухсатномани жорий қилиш таклиф этилмоқда. “Адолатли Россия — ҳақиқат учун” партияси депутатлари мазкур қонун лойиҳасини муҳокама қилишга тақдим этди.
Унга кўра, ишлаш учун рухсатномани олишда мигрантлар суратга тушиб, бармоқ излари билан рўйхатдан ўтиши шарт бўлади.
“Мигрантларни ишга жалб этиш тизими бўйича таклиф этилаётган ўзгартиришлар чет эл фуқароларининг ҳудудлар бўйича тақсимланиши устидан назоратни кучайтиришга, бюджет даромадларини оширишга ҳамда мигрантлар ва мамлакатимиз фуқароларининг ишга жойлашиш бўйича шароитларини тенглаштиришга ёрдам беради”, — дейди партия етакчиси Сергей Миронов.
Унинг таъкидлашича, Россияда миграция оқимларини назорат қилиш мақсадида 2015 йилда барча мигрантлар учун мажбурий тарзда патент тизими жорий қилинган, аммо текширув натижалари мигрантларда патентнинг бор-йўқлиги уларнинг ишга жойлашишида жиддий таъсир ўтказмаётганини кўрсатмоқда.
“Шу сабабли биз самарасиз тизимни бекор қилишни таклиф қиламиз”, — деган партияси етакчиси.
Унинг қайд этишича, бугунги кунда патент нархи ҳудудларга қараб ойига 2724 рублдан 10 929 рублгача бўлиб, бу маблағлар тўлиқ бюджетга ўтказилади. Агар патент тизими бекор қилинса, барча меҳнат муҳожирлари Россиянинг фуқаролари учун белгиланган даромад солиғини тўлиқ миқдорда тўлашлари шарт бўлади.
Изоҳ (0)