Россиянинг Фан ва олий таълим вазирлиги мигрантлар учун рус тили, Россия тарихи ва қонунчилик асослари бўйича имтиҳонларнинг ягона нархини белгилашни таклиф қилди. Тегишли қарор лойиҳаси норматив-ҳуқуқий ҳужжатлар лойиҳалари порталида эълон қилинди. Бу ҳақда “РБК” хабар берди.
Ҳужжатга кўра, вазирлик қуйидаги ягона нархларни таклиф қилмоқда:
- фуқаролик олиш учун рус тили имтиҳони — 2950 рубль;
- фуқаролик олиш учун тарих ва қонунчилик асослари бўйича имтиҳон — 2950 рубль;
- вақтинчалик яшаш рухсатномаси (РВП) ёки яшаш гувоҳномаси (ВНЖ) олиш учун рус тили, тарих ва қонунчилик асослари бўйича имтиҳон — 5900 рубль;
- ишлашга рухсатнома ёки патент олиш учун рус тили, тарих ва қонунчилик асослари бўйича имтиҳон — 3800 рубль.
Ҳозирда мазкур имтиҳонлар учун ягона нарх белгиланмаган. Имтиҳон ўтказувчи ташкилот ушбу хизматлар нархини ўзи белгилайди. Бу имтиҳон ўтказиш билан бевосита боғлиқ тўғридан тўғри харажатлар, билвосита харажатлар ва қўшимча қиймат солиғини ўз ичига олади.
Хизмат нархининг максимал миқдори ҳам белгиланган. У ҳозирда Фан ва олий таълим вазирлиги томонидан доимий нарх сифатида белгилаш таклиф этилаётган миқдорлар билан деярли бир хил: вақтинчалик яшаш рухсатномаси (РВП) ёки яшаш гувоҳномаси (ВНЖ) учун — 5900 рубль, иш рухсатномаси ёки патент учун — 3800 рубль.
Изоҳ (0)