Россиядаги ноқонуний мигрантлар 30 апрелгача мустақил равишда мамлакатни тарк этиши ёки ўз ҳуқуқий ҳолатини тартибга солиши керак. Россия президенти Владимир Путиннинг ноқонуний мигрантларни чиқариб юбориш тўғрисидаги қонунни ривожлантириш мақсадида имзолаган фармонида бу ҳақда сўз боради.
Россиядан миграция режими бўйича чиқариб юбориш 2025 йил 5 февралдан бошлаб жорий этилади. У Россияда қонуний асосда бўлиш ҳуқуқига эга бўлмаган хорижликларга нисбатан қўлланилади. Ушбу тоифага кирувчи барча фуқаролар чиқариб юборилгунга қадар ёки ҳуқуқий ҳолати тартибга солингунча назорат қилинадиган шахслар реестрига киритилиши шарт.
Истисно ҳолатлар
Чиқиб кетиш талаби қонуний асосда қолишни истаган ва қуйидаги шартларга жавоб берадиган хорижликларга нисбатан қўлланилмайди: биометрик маълумотларни топширган, гиёҳванд моддалар ва юқумли касалликлар бўйича тестдан ўтган, рус тили, Россия тарихи ва қонунларини билиши тўғрисидаги ҳужжатларни тақдим этган, қарзларини тўлаган бўлса. Бунда патент, ишлаш ёки вақтинча ҳамда доимий яшаш гувоҳномасини бекор қилиш учун асослар бўлмаслиги керак.
Урушга ёлланганларга имтиёзлар берилади
Россия армияси ёки ҳарбий тузилмаларида хизмат қилиш учун шартнома тузган хорижликлар учун имтиёзлар берилган. Уларга нисбатан “олдин қабул қилинган депортация, реадмиссия, Россияга киришга рухсат бермаслик, Россияда бўлишнинг номақбуллиги, вақтинча бўлиш муддатини қисқартириш тўғрисидаги қарорлар ўз кучини йўқотади ва ижро этилмайди”.
Маълумот ўрнида, Ўзбекистон фуқароларига чет давлатларининг ҳарбий хизматига ёлланиш қонунан тақиқланади!
Изоҳ (0)