Россияда муҳожирлар фақат битта ишда фаолият юритиши ва бу уларнинг патентларида акс эттирилиши мумкин. Қурилиш вазирлиги тегишли таклифни илгари сурди. Бу ҳақда “Известия” хабар берди.
“Россия Федерациясида чет эл фуқароларининг ҳуқуқий ҳолати тўғрисида”ги қонунга ўзгартиришлар киритиш режалаштирилмоқда. Қурилиш соҳасида янги тартиб 2025 йилнинг апрель июнь ойларида жорий этилиши мумкин. У бошқа соҳаларга ҳам татбиқ этилиши эҳтимоли бор.
Қурилиш вазирлиги бу чора кадрлар қўнимсизлигини бартараф этишга ва мигрантлар устидан назоратни кучайтиришга ёрдам беради, деб ҳисоблайди.
Бу йил Россияда миграция сиёсати кескинлашди. Хусусан, чет элликлар учун патент ва ишлаш рухсатномасини олиш мақсадида ўтказиладиган тест тизимига ўзгартиришлар киритилди: ундан тижорат тузилмалари чиқариб ташланди, энди мигрантлар фақат Россиянинг 92 та давлат муассасасида имтиҳон топширади. Улар тест синовларида рус тили, Россия тарихи ва мамлакат қонунчилиги асосларини билишларини кўрсатишлари лозим.
Тест синовлари учун ягона нархлар белгиланди
- фуқаролик олиш учун рус тили имтиҳони — 2950 рубль;
- фуқаролик олиш учун тарих ва қонунчилик асослари бўйича имтиҳон — 2950 рубль;
- вақтинчалик яшаш рухсатномаси (РВП) ёки яшаш гувоҳномаси (ВНЖ) олиш учун рус тили, тарих ва қонунчилик асослари бўйича имтиҳон — 5900 рубль;
- ишлашга рухсатнома ёки патент олиш учун рус тили, тарих ва қонунчилик асослари бўйича имтиҳон — 3800 рубль.
Россия президенти матбуот котиби Дмитрий Песковга кўра, мигрантлар Россия учун оғир демографик вазият шароитида “зарурат” ҳисобланади. Мигрантлар мамлакатнинг жадал ривожланиши учун керак бўлгани сабабли, Россия уларнинг келишини маъқуллайди.
Турли даражадаги ҳукумат вакиллари мигрантлар ҳақида танқидий фикр билдирмоқда
Жумладан, Липецк вилояти губернатори Игор Артамонов айтишича, аҳолига на қонуний, на ноқонуний мигрантлар “ёқмайди”, аммо уларсиз иложи йўқ. У муҳожирлар “ўзлари хоҳлаган жойда эмас, балки бизга керак бўлган соҳаларда ишлашлари лозим” деган.
Губернаторнинг фикрича, баъзи соҳаларда, масалан, таиландликлар ишга олиб келинадиган массаж хизматида, мигрантларсиз ҳам ишни юритиш мумкин. Бироқ қурилишда мигрантлар жуда зарур ҳисобланади.
Изоҳ (0)