Рус тили, Россия тарихи ва қонунчилигига оид имтиҳонларни ўтказиш ва сертификат бериш тизими Ўзбекистонда йўлга қўйилиши кутилмоқда.
Миграция агентлиги матбуот хизматининг хабар қилишича, бу масала Қозон Федерал университети раҳбарияти билан учрашув давомида муҳокама қилинди.
“Марказнинг Ўзбекистонда фаолият юритиши Россияда ишлаш ҳуқуқини берувчи руҳсатнома (патент) расмийлаштиришда талаб қилинадиган сертификат олиш жараёнларини сезиларли тарзда енгиллаштиради, харажатлар камаяди, ҳамюртларимиз учун ортиқча оворагарчиликлар олди олинади”, дейилади хабарда.
Миграция агентлиги раҳбарияти бошчилигида делегация аъзолари Санкт Петербургда “Северний” миграция марказида бўлиб, ўзбекистонликлар билан ҳам учрашди. Уларга легализация жараёнлари, ҳуқуқий мақомини расмийлаштириш ва патент олиш бўйича маълумотлар берилди. Рус тили имтиҳонлари ҳамда тиббий кўрик жараёнлари билан яқиндан танишилди.
Шунингдек, Халқаро меҳнат миграциясига кўмаклашиш ассосиацияси ҳамда “СберБанк” масъуллари билан учрашувда “СберБанк”нинг “Меҳнат мигранти электрон картаси” лойиҳаси муҳокама қилинди.
“Меҳнат мигранти электрон картаси” — Россияда вақтинча меҳнат қилаётган фуқаролар учун махсус ишлаб чиқилган банк картаси бўлиб, уларнинг молиявий операцияларини соддалаштириш ва расмийлаштириш мақсадида жорий қилинган.
Делегация аъзолари “Балтийский берег”, “Мигросервис”, “МируСтрой” каби компаниялар вакиллари, “Токио Сити” ресторанлар тармоғи, “Петрович” қурилиш ширкати ва “Бахрома” ресторани раҳбарлари билан Ўзбекистон фуқароларини ишга жалб этиш бўйича музокаралар ҳам ўтказди.
Изоҳ (0)