Россиянинг Иркутск вилояти губернатори Игор Кобзев патент асосида ишлаётган хорижликлар учун фаолият турларига чекловлар белгиловчи фармонни имзолади.
Унга кўра, 2025 йилдан бошлаб уларга йўловчи ташишнинг айрим турларини амалга ошириш, жумладан, таксида ишлаш тақиқланади. Шунингдек, хорижликлар гидлик қилиш, бола парвариши билан шуғуллана олмайди ва таълим муассасаларида иш топа олмайди.
Фармонга кўра, келаси йилдан бошлаб хориж фуқароларининг ўрмон хўжалиги, доривор маҳсулотлар ишлаб чиқариш, жумладан, ҳайвонлар учун дори воситалари каби тармоқларда, ёғоч, тамаки ва алкоголли маҳсулотлар улгуржи савдосида ҳам фаолият юритиши тақиқланади.
Чеклов шаҳар ичида ва ундан ташқарида йўловчи ташишга тааллуқлидир. Келгуси йилдан бошлаб хорижликларнинг геология-қидирув ва ер қаърини ўрганиш ҳамда минерал-хом ашё базасини қайта ишлаб чиқариш билан боғлиқ бошқа турдаги ишлар билан шуғулланишига ҳам йўл қўйилмайди.
Июнь ойида Иркутск вилояти ИИВ вакили Александр Сверлов 2024 йилнинг ўтган беш ойи якунлари бўйича вилоятга 38 мингдан ортиқ хорижий фуқаролар келганини маълум қилган.
Аввалроқ Россия меҳнат вазири Антон Котяков Ички ишлар вазирлиги билан биргаликда меҳнат муҳожирларини жалб қилишнинг амалдаги тизимини ўзгартириш кўриб чиқилаётгани хабар қилинган эди.
Котяков Россия муҳожирларнинг эркин киришини тақиқлаши ва “цивилизациялашган модель”дан фойдаланиши мумкинлиги ҳақида фикр билдирган. У амалдаги модель бизнес учун маълум хавфларни келтириб чиқариши, чунки иш берувчилар мигрантларни ўқитиш ва тиббий кўрикдан ўтказиш харажатларини қоплашини айтган.
Изоҳ (0)