Кремлда Украинани қайта тиклашга ёрдам бериш учун Россиянинг музлатилган активларининг катта қисмидан воз кечишга розилик бериш ҳақида гап кетмоқда, дея хабар бермоқда Reuters агентлиги учта манбага таяниб.
Шу билан бирга, Москва бу маблағнинг бир қисмини Украинадаги ҳарбий можаро пайтида Россияга қўшиб олинган ҳудудларга сарфланишини талаб қилади, дейди агентлик манбалари.
Таклиф Украинадаги можаронинг келажакдаги ечими доирасида муҳокама қилинмоқда. Музлатилган активлар ҳажми 300-350 миллиард долларга баҳоланмоқда, агентлик манбаларига кўра, Россия Украина ва унинг янги ҳудудларини тиклаш учун 300 миллиард доллар ўтказиб бериши мумкин.
Шу билан бирга, Жаҳон банки, БМТ, Европа комиссияси ва Украина ҳукумати томонидан ўтган йилги ҳисоб-китобларга кўра, Украина иқтисодиётини тиклаш учун 486 миллиард доллар керак бўлади, Украинадаги уй-жой фондининг 10 фоизи вайрон бўлган ёки бузилган. Каховка ГЭСнинг вайрон бўлиши натижасида атроф-муҳит ва қишлоқ хўжалигига катта зарар етказилди. Энг кўп зарар кўрган тармоқлар уй-жой коммунал хўжалиги, транспорт, савдо, саноат ва қишлоқ хўжалигидир.
Украина бош вазири Денис Шмигалнинг айтишича, мамлакатнинг тикланиши учун ресурсларнинг асосий манбаи “Ғарбда музлатилган Россия активларини мусодара қилиш бўлиши керак”.
2024 йил май ойида Европа иттифоқи музлатилган активлардан тушган даромадни санкциялар бекор қилинганидан кейин ҳам Россияга ўтказмасликка қарор қилди. Россиянинг Европа иттифоқидаги миссияси Европа иттифоқи кенгаши қарорини “ўғрилик” деб атади.
Изоҳ (0)