БМТ Тараққиёт дастури доирасида Тошкент шаҳар жамоат транспортида электробуслардан фойдаланиш ва инфраструктурани ривожлантириш билан боғлиқ лойиҳа амалга оширилмоқда. Бу ҳақда Транспорт вазирлиги ахборот хизмати “Дарё”га маълум қилди.
Айтилишича, “Тошкент – паст углеродли транспортга инвестицияларни жадаллаштириш” (ТАILEV) лойиҳаси амалга оширилмоқда. Мазкур масала юзасидан БМТ Тараққиёт дастурининг Ўзбекистондаги доимий вакили Акико Фужии транспорт вазири билан учрашган.
Шунингдек, БМТ ТД вакиллари Тошкент шаҳридаги 8-автобус саройига ташриф буюриб, электробус парки ҳамда уларни қувватлаш инфратузилмаси билан танишган. Тадбирда Акико Фужии хоним “Тошшаҳартрансхизмат” акциядорлик жамияти томонидан харид қилинган электробусларнинг бир қисми Глобал Экологик Жамғарманинг грант маблағлари ҳисобидан қисман молиялаш учун 1 миллион 220 ми доллар маблағи сертификатини топ.
Маълумот учун, “Тошшаҳартрансхизмат” АЖ автобус саройи филиалларида 2 минг 17 дона ҳаракат таркиби мавжуд. Шундан 672 донаси дизель ёқилғисида (33 фоиз), 1 минг 20 донаси табиий газ ёқилғисида (50 фоиз), 324 донаси электр энергиясида (17 фоиз) ҳаракатланади. 2022—2023 йилларда сотиб олинган автобусларнинг 58,7 фоизи сиқилган табиий газда, 21,4 фоизи электр энергиясида ҳаракатланади.
Натижада ҳаракат таркибининг ўзидан чиқадиган зарарли моддалар миқдори 2022 йилда 5,1 минг тоннани, 2023 йилда 4,8 минг тоннани ташкил этган. 2024-2030 йилларда қўшимча 1 200 дона электробус харид қилиш ва автобусларни табиий газ ёқилғисига ўтказиш кўзда тутилган.
Шавкат Мирзиёев 2023 йилнинг сентябрь ойида Хитойнинг етакчи BYD компанияси президенти ва асосчиси Ван Чуанфу бошчилигидаги делегацияни қабул қилганди. Учрашувда компаниянинг Ўзбекистондаги фаолиятини кенгайтиришнинг амалий жиҳатлари, хусусан, Жиззах вилоятида гибрид ва электр автомобиллар ишлаб чиқаришни тез фурсатда йўлга қўйиш ҳамда кейинги босқичларда унинг қувватини 300 минг донага етказиш масалалари кўриб чиқилган.
Октябрь ўрталарида эса Тошкент ҳокимлиги Хитойнинг BYD автомобиль ишлаб чиқарувчи компанияси билан 2000 та электробус сотиб олиш бўйича рамка шартномасини имзолаганди.
Изоҳ (0)