Тошкент шаҳрида 6 декабрдан бошлаб “гормошкали” электробуслар қатнови йўлга қўйилди, деб хабар беради “Тошшаҳартрансхизмат”.
Маълум қилинишича, Тошкент шаҳри учун харид қилинган 200 дона ўта катта сиғимли King Long русумли автобусларга ишлаб чиқарувчи завод — Xiamen King Long United Automotive Industry Co., Ltd томонидан бонус тариқасида қўшимча равишда 2 дона King Long электробуси тақдим этилган.
Ҳозирги кунда King Long русумли электробусларни тест синовларидан ўтказиш ҳамда ушбу электробусларни бошқарувчи ҳайдовчиларни ўқитиб махсус сертификатлар билан таъминлаш ишлари ниҳоясига етказилган. Шу муносабат билан мазкур ўта катта сиғимли электробуслар 6 декабрь кунидан бошлаб “2-автобус саройи” филиалига бириктирилган 14-сонли ТТЗ АШБ — Тошкент вокзали автобус йўналишида хизмат кўрсатишни бошлаган.
Ушбу жамоат транспортларининг Тошкентга келиши ҳақидаги хабарлар август ойи охирида тарқалган, бироқ пойтахт учун бундай электробусларни харид қилиш ҳақида хабар берилмаган эди.
Апрель бошида “Янги Ўзбекистон” боғида Хитойдан олиб келинган 268 та автобус ва электробусларни топшириш маросими бўлиб ўтганди. Ушбу жамоат транспорти воситаларининг 101 таси электробус, 109 таси газда ҳаракатланувчи (12 метрли) автобус, 48 таси катта сиғимли (“гормошка”) автобуслардир. Мазкур автобус ва электробуслар King Long ва Yutong компаниялари томонидан ишлаб чиқарилган.
Изоҳ (0)