Тошкент шаҳрига Хитойдан 233 та автобус ва электробуслар олиб келинди. Май ойигача яна 767 та шу турдаги транспорт воситалари келтирилади. Бу шаҳарда ҳаракатланаётган автобуслардаги тиқилинчни камайтирадими? Автобуслар орақлиқ интервали қисқарадими? “Тошшаҳартрансхизмат” АЖ бошқарув раиси Анвар Жўраев “Дарё” мухбири билан суҳбатда ушбу саволларга жавоб берди.
“Мингтадан 300 таси электробус”
Хитойнинг Kingvong заводидан 18 метрли табиий газда ҳаракатланадиган автобуслар (200 та), Yutong компаниясидан 500 та газда юрадиган автобус ва 300 та электробус келтирилмоқда.
Барча автобуслар техник шартларига йўловчилар оқимини санаш мосламаси, хавфсизлик учун видеокамера ўрнатилган. Салонида йўловчиларга қулайлик яратиш мақсадида экранлар ҳам мавжуд. Мониторда оралиқлар, бекатлар эълон қилиб борилади. Мингта янги автобус 167 та йўналишда ҳаракатланади.
.jpg)
“Оралиқ интервал камаяди”
Ҳозирда автобусларда кунига 670 минг йўловчи ташияпмиз. Келаётган янги автобуслар билан қўшиб ҳисоблаганда кунига 1 800 та автобусни ҳаракатга чиқариш режалаштирилган.
Бугунги кунда оралиқ интервалларимиз 20 дақиқани ташкил қилаётган бўлса, янги автобуслар тўлиқ ишга тушса, йўловчи энг кўп бўлган йўналишларда интервал 4-5 дақиқа бўлади. Халқа, етказиб берувчи ва боғловчи йўналишларда эса орақлиқ интервал 6-7 дақиқани ташкил этади. Жамоат транспортида жозибардорлик ошгани ҳисобига йўловчилар сони бир миллион нафарга етиши кўзда тутилмоқда. Бу 1,5 баравар ўсиш дегани.
“Янги тарифларга ўтамиз”
Май ойидан янгича тарифлар тизими жорий қилинади. Электрон ва нақд тўловлар ўртасида тафовут бўлади. Бунда биринчи тўлов 1 400 сўм, иккинчи автобусга ўтилганда 600 сўм, учинчи ва тўртинчисида бир соат ичида текин бўлади. Автобусдан метрога ўтганда тўлов минг сўм бўлади. Бу ҳам йўловчиларни жамоат транспортига жалб қилишда янги механизм.
Бу тизимда фақатгина транспорт карта ва электрон тўловдан фойдаланганда чегирма берилади. Нақд пул бўлса, чегирма ўтмайди. Айтиш керакки, бу бутун дунё тажрибасидир. Биз электрон тўлов тизимига ўцак, шаффофлик бўлади.
Изоҳ (0)