Тошкент шаҳар ҳокимининг “Тошшаҳартрансхизмат” акциядорлик жамиятига маблағ ажратиш тўғрисидаги қарори қабул қилинди.
Ҳужжатга кўра, “Тошшаҳартрансхизмат” АЖга республика бюджетидан Тошкент шаҳар маҳаллий бюджетига ажратилган ссуда маблағлари ҳисобидан Чекланган тарифлар бўйича йўловчиларни ташиш хизматларини кўрсатиш муносабати билан шаҳар йўловчи ташиш транспорти ташувчилари кўрадиган зарарларни қоплаш харажатлари учун 18 миллиард сўм ажратилади.
Пойтахт ҳокимининг биринчи ўринбосари халқ депутатлари Тошкент шаҳар кенгашининг навбатдаги йиғилишига ажратилган маблағлар бўйича ҳисобот киритади. Ўз навбатида “Тошшаҳартрансхизмат” ажратилган маблағларнинг ўрнатилган тартибда мақсадли сарфланишини таъминлайди.
Апрель бошида “Янги Ўзбекистон” боғида Хитойдан олиб келинган 268 та автобус ва электробусларни топшириш маросими бўлиб ўтганди. Ушбу жамоат транспорти воситаларининг 101 таси электробус, 109 таси газда ҳаракатланувчи (12 метрли) автобус, 48 таси катта сиғимли (“гармошка”) автобуслардир. Мазкур автобус ва электробуслар King long ва Yutong компаниялари томонидан ишлаб чиқарилган.
Автобусларда “кунлик планлар”нинг бекор бўлиши
Тошкентда 5 май кунидан бошлаб, 5, 11, 18, 19, 37, 44, 67, 77, 83, 136, 139, 142, 72 ва 81-сонли пойтахт бўйлаб ҳаракатланувчи автобус йўналишларида хизмат кўрсатиш янги турдаги брутто-шартнома асосида ташкил этилган.
Брутто-шартномалар — бу йўловчи ташишни ташкил этиш модели бўлиб, унда барча тушумлар шаҳар бюджетининг махсус ҳисоб рақамига ўтказилади ва шаҳар маъмурияти йўловчи ташувчига йўналишлар бўйича тўловларни бажарилган иш ҳажмидан келиб чиқиб, сифат назорати остида ўтказиб беради.
Қулай тарифлар
Мазкур қарор билан жамоат транспортидан фойдаланишда йўловчилар учун қулай тарифларни жорий этиш белгиланган. Гап бир соат ичида бир йўналишли йўловчи транспортидан бошқасига ўтиш сонидан келиб чиққан ҳолда имтиёзли ва бепул тарифлар қўлланилиши ҳақида кетмоқда.
Бундан ташқари, йўналишли йўловчи транспортидан фойдаланишда, унинг туридан қатъи назар, кунлик, бир, уч ва олти ойлик, йиллик чекланган ва чекланмаган тариф режалари жорий этилиши кутилмоқда. Йўналишларда йўлкира ҳақини тўлашда электрон тўлов тизимидан фойдаланишни рағбатлантирувчи тарифлар белгиланади.
Изоҳ (0)