Транспорт вазири Илҳом Маҳкамов 19 июль куни Европа тикланиш ва тараққиёт банки Марказий Осиё ва Мўғулистон бўйича директори Ҳусейн Озхан бошчилигидаги делегация вакиллари билан учрашди. Бу ҳақда Транспорт вазирлиги матбуот хизмати хабар берди.
Маълум қилинишича, учрашувда мамлакат транспорт тизими ва инфратузилмасини ривожлантириш борасида амалга оширилаётган лойиҳалар юзасидан фикр алмашилди.
Хусусан, Тошкент—Самарқанд пулли автомобиль йўлининг техник-иқтисодий асосини якунлаш ҳамда Самарқанд шаҳри учун электробусларни харид қилиш лойиҳалари доирасида амалга оширилаётган ишларни жадаллаштириш масалалари муҳокама этилди.
Шунингдек, томонлар Нукус ва Наманган шаҳарлари учун электробуслар ҳамда Самарқанд шаҳри учун трамвай харид қилиш бўйича истиқболли лойиҳаларини амалга ошириш юзасидан фикр алмашди.
Ушбу лойиҳаларни амалга ошириш бўйича ҳамкорликдаги ишларни давом эттиришга келишиб олинди.
Аввалроқ 2024 йилда Хитой Эксимбанки Транспорт вазирлигига табиий газда ҳаракатланувчи 1000 дона автобус ҳамда “Тошшаҳартрансхизмат” корхонаси учун 200 дона электробус хариди учун жами 180 миллион доллар миқдорида қарз маблағлари ажратиши тўғрисида хабар берилганди. 2024 йилда Ўзбекистон ҳудудлари жамоат транспорти учун 2 минг дона автобус ва 2 минг дона микроавтобус харид қилинади.
Изоҳ (0)