Тошкент шаҳрига яна 1000 та Yutong автобусларини олиб келиш имкониятлари ўрганилмоқда. Бу ҳақда Транспорт вазирлиги матбуот хизмати хабар берди.
Маълум қилинишича, вазир Илҳом Маҳкамов Хитойнинг Yutong Bus компаниясининг халқаро маркетинг бўйича вице-президенти Цюй Пен билан учрашиб, Ўзбекистонда жамоат транспорти тизимини ривожлантириш жараёнида ҳаракат таркибларини янгилаш борасидаги вазифаларни муҳокама қилди.
Хусусан, томонлар 200 та электробус сотиб олиш лойиҳасини амалга оширишнинг ҳозирги ҳолатини, шунингдек, Тошкент шаҳри учун яна 1000 та автобус сотиб олиш бўйича истиқболли лойиҳа юзасидан фикр алмашди. Шунингдек, хусусий тадбиркорлар томонидан электробусларни сотиб олиш учун қулай шарт-шароитлар яратиш билан боғлиқ жиҳатлар атрофлича муҳокама этилди.
Транспорт вазири Ўзбекистонда фойдаланилаётган Yutong компанияси томонидан ишлаб чиқарилган автобус ва электробуслар сони ортиб бораётганидан келиб чиқиб, компания томонидан кўрсатилаётган сервис хизматларини кучайтириш зарурлигини таъкидлади.
2023 йил октябрида Тошкент ҳокимлиги Хитойнинг BYD автомобиль ишлаб чиқарувчи компанияси билан 2000 та электробус сотиб олиш бўйича рамка шартномасини имзолаганди. 2024 йил октябрида БМТ Тошкентда сотиб олинган электробусларнинг кредитини қоплаш учун миллион доллардан ортиқ маблағ ажратди.
Президент ҳузурида ўтказилган транспорт-логистика тизимини ривожлантириш бўйича тақдимотда 2025 йилда Тошкентга қўшимча 1000 та автобус олиб келиш бўйича топшириқ берилганди.
Изоҳ (0)