Toshkent hokimligi Xitoyning BYD avtomobil ishlab chiqaruvchi kompaniyasi bilan 2000 ta elektrobus sotib olish bo‘yicha ramka shartnomasini imzoladi.
Qayd etilishicha, kompaniya K9UD eBus elektrobuslarni mahalliy iqlim va Toshkentdagi yo‘l sharoitlariga moslab ishlab chiqaradi.
“K9UD eBus modeli uzunligi 12 metr bo‘lib, 90 nafargacha yo‘lovchini sig‘dira oladi. Past pol keksalar va bolalarning avtobusga chiqish va tushishini osonlashtiradi, keng salon esa haydash qulayligini oshiradi”, —deyiladi xabarda.
“Gazeta.uz”ning kompaniya matbuot xizmatiga tayanib yozishicha, 200 ta elektrobusning birinchi partiyasi 2024-yilda keltirilishi kutilmoqda.
“Biz BYD nol emissiyali elektr avtobuslarini Toshkentga olib kelganimizdan mamnunmiz. Biz Toshkent hokimligi bilan birgalikda aholini xavfsiz, ishonchli, qulay va toza jamoat transporti bilan taʼminlashga umid qilamiz”, — deydi BYD Tijorat transport vositalarini ekspluatatsiya qilish departamenti bosh direktori Chunlun Tyan.
Toshkent hokimi vazifasini bajaruvchi Shavkat Umurzoqov BYD elektrobuslarini xarid qilish bo‘yicha ushbu kelishuv O‘zbekistonning “yashil” iqtisodiyotga o‘tish strategiyasiga mos kelishi, transportni elektrlashtirish fuqarolarning hayot sifatini yaxshilashga xizmat qilishini taʼkidlagan.
Sentyabr oxirlarida Shavkat Mirziyoyev Xitoyning yetakchi BYD kompaniyasi prezidenti va asoschisi Van Chuanfu boshchiligidagi delegatsiyani qabul qilgandi.
Uchrashuvda kompaniyaning O‘zbekistondagi faoliyatini kengaytirishning amaliy jihatlari, xususan, Jizzax viloyatida gibrid va elektr avtomobillar ishlab chiqarishni tez fursatda yo‘lga qo‘yish hamda keyingi bosqichlarda uning quvvatini 300 ming donaga yetkazish masalalari ko‘rib chiqilgan.
Izoh (0)