Andijon viloyatiga Xitoydan 100 ta elektrobus xarid qilinishi rejalashtirilgan, deb xabar bermoqda Transport vazirligi.
Qayd etilishicha, Andijon viloyatida jamoat transporti tizimini rivojlantirish, aholiga qulay va sifatli transport xizmatlari ko‘rsatishni tashkil etish maqsadida yo‘lovchi tashish faoliyati bilan shug‘ullanuvchi korxonalar harakat tarkibini yangilash masalasiga e’tibor qaratilmoqda.
Harakat tarkibini yangi zamonaviy avtobus va elektrobuslar bilan to‘ldirish, shuningdek, Andijon shahrida brutto-shartnoma tizimini to‘liq ishga tushirish maqsadida 100 ta elektrobus xarid qilinishi rejalashtirilgan.
Shu munosabat bilan Andijon viloyati hokimligi, Andijon viloyati transport boshqarmasi, “O‘zmilliybank” AJ hamda salohiyatli tadbirkorlardan iborat delegatsiya ayni paytda Xitoyda bo‘lib turibdi.
Delegatsiya a’zolari Lanzhou Guangtong Nev Energy Automobile Co., Ltd va Guangtong kompaniyasi tomonidan elektrobuslarni ishlab chiqarish jarayoni, yetkazib berish xizmati va boshqa mavzularda muzokaralar o‘tkazib shartnomalar imzolash bo‘yicha amaliy ishlarni olib bormoqda.
2023-yil oktyabrida Toshkent hokimligi Xitoyning BYD avtomobil ishlab chiqaruvchi kompaniyasi bilan 2000 ta elektrobus sotib olish bo‘yicha ramka shartnomasini imzolagandi. 2024-yil oktyabrida BMT Toshkentda sotib olingan elektrobuslarning kreditini qoplash uchun million dollardan ortiq mablag‘ ajratdi.
Prezident huzurida o‘tkazilgan transport-logistika tizimini rivojlantirish bo‘yicha taqdimotda 2025-yilda Toshkentga qo‘shimcha 1000 ta avtobus olib kelish bo‘yicha topshiriq berilgandi.
Shuningdek, Samarqand shahriga noyabr oyida rejalashtirilgan 30 ta elektrobuslarning 8 tasi, Sirdaryo viloyatining Guliston shahriga Xitoydan 8 ta zamonaviy avtobus olib kelingandi.
Izoh (0)