Ижтимоий тармоқларда Тошкент шаҳрига янги келтирилган иккита “гармошка” автобуснинг том қисмидаги қоплама қўпорилиб тушгани акс этган сурат ва видеолар тарқалди. Айрим блогерлар ҳолатни автобуслар сифатсизлиги билан боғлашга уринган. “Тошшаҳартрансхизмат” АЖ раиси Анвар Жўраев “Дарё” мухбири билан суҳбатда муҳокамаларга сабаб бўлган мазкур воқеага изоҳ берди.
Бугун, 2 май куни “Тошшаҳартрансхизмат” томонидан пойтахтдаги 8-автобус саройига пресс-тур уюштирилди. Унда иштирок этган “Тошшаҳартрансхизмат” раиси Анвар Жўраев “гармошка” автобуснинг том қисмидаги қоплама қўпорилиб тушгани тўғрисидаги воқеани изоҳлади.
“Воқеа Юнусобод туманида, йўловчи оқими катта бўлган йўналишда юз берди. У ерда автобуслар ҳаракатланиши учун алоҳида йўлак ташкил этилган. Чинор дарахти ўсиб, йўл қисмига чиқиб кетгани ҳисобига шохлари кўчада ҳаракатланаётган автобус устидаги пластикдан ясалган газ баллон тўсиғини кўчириб юборган. Газ баллонга ёки бошқа қисмларга шикаст етмаган. Хавфсизлик қобиғи жойидан қўзғалиб тушиб кетган, уни жойига қўйдик. Дарахтнинг майда шохлари ободонлаштириш хизмати ходимлари томонидан олиб ташланди. Ҳозир ЙҲХБ билан йўл тасмалари қайта кўриб чиқилмоқда. Дарахтга шикаст етказилмаслигига алоҳида эътибор қаратиляпти”, – деди у.
Анвар Жўраев сўзи давомида воқеани нотўғри талқин қилган блогерларга мурожаат қилди.
“Қандайдир ҳолат бўлса, расмийми ёки норасмийми бизларга мурожаат қилсангиз, у нимадан келиб чиққанини ёритиб берардик. Бу воқеанинг автобуснинг сифатсизлигига умуман алоқаси йўқ. Қобиқ дарахт шохининг тегиб кетгани сабаб кўчиб кетган. Албатта, бу ерда ҳайдовчининг айби бор. У эътиборсизлиги сабаб шу воқеа содир бўлди. Хатога йўл қўйган ҳайдовчилар ва масъулларга чора кўрилди”, – деди ташкилот раҳбари.
Аввалроқ Ўзбекистон Хитойдан мингта автобус ва электробуслар сотиб олгани хабар қилинганди. Хусусан, 200 дона Хитойнинг “Кингвонг” заводидан 18 метрли табиий газда ҳаракатланадиган автобуслар (“гармошка”), 500 та газда юрадиган автобус ва 300 та электробус Yutong компаниясидан келтирилмоқда. Сўнгги маълумотларга кўра, ҳозиргача улардан 500 таси Тошкентга келтирилган.
Изоҳ (0)