“Мутахассислар Тошкент шаҳрига трамвай киритилса, каттароқ тирбандликка дуч келишимизни айтмоқда” — Транспорт вазири Илҳом Маҳкамов

Тошкент шаҳрида трамвай қурилиши катта тирбандлик келтириб чиқариши мумкин. Бу ҳақда Транспорт вазири Илҳом Маҳкамов “Дарё” мухбирига берган интервьюсида айтди.

Тошкент шаҳрига Хитойдан 233 та автобус ва электробуслар олиб келинди. 8 апрель куни “Янги Ўзбекистон” боғида траспорт воситаларининг биринчи партиясини қабул қилиш маросими ўтказилди. Тадбирдан сўнг Транспорт вазири Илҳом Маҳкамов электробуслардан бирида бўлиб, журналистлар билан суҳбатлашди.

Вазирнинг айтишича, Ўзбекистон Хитойнинг Yutong ва КингЛонг компанияларидан жами мингта автобус ва электробус харид қилган.

“Мазкур транспорт воситаларининг умумий нархи 210 миллион доллар. Апрель ойи якунигача заводлар барча автобус ва электробусларни Ўзбекистонга юборади. Ҳозирда Тошкент шаҳрида жами 1 минг 900 та автобус ҳаракатланади. Янги автобусларнинг олиб келиниши автобуслар ичидаги тиқилинчни камайтиради. Шу билан бирга, интервални ҳам 3-4 дақиқага туширамиз”, — деди вазирлик раҳбари.   

Илҳом Маҳкамов суҳбат давомида шаҳарга трамвай линиясини қайтариш бўйича режа йўқлигини айтди.  

“Мутахассислар Тошкент шаҳри ичига трамвай киритилса, биз каттароқ тирбандликка дуч келишимизни айтмоқда. Трамвай юргандан кейин эмас, қурилиш жараёнида. Бу кўп вақт ва маблағ талаб қилади. Шунинг учун яқин орада президентимиз ҳузурида ‘Янги Тошкент’ билан ‘Эски Тошкент’ни боғлайдиган трамвай лойиҳаси тақдимотини ўтказамиз”, — деди вазир.

Эслатиб ўтамиз, 2016 йилнинг баҳорида Марказий Осиёдаги энг қадимги ва йирик енгил релсли транспорт тизими — Тошкент трамвайларининг 115 йиллик тарихига нуқта қўйилганди. Бунга Тошкент шаҳрининг ўша вақтлардаги ҳокими Раҳмонбек Усмоновнинг трамвай йўналишлари фаолиятини самарасиз деб топгани сабаб бўлган. Шундан сўнг пойтахтдаги вагонларининг яроқлилари Самарқанд вилоятига етказилган.

Ўзбекистон президенти Шавкат Мирзиёев 2022 йил февралда Самарқанд вилоятига ташрифи давомида фуқаролар мурожаати сабаб трамвайни Тошкентга қайтаришни айтиб ўтган. “Трамвайни Тошкентга ҳам қайтармоқчимиз. Фуқаролардан бу борада кўплаб хатлар ва мурожаатлар келяпти”, — деган президент.

Мавзуга доир:

Марказий Осиёдаги энг катта, қадимий, собиқ ва “бўлажак” Тошкент трамвайи тарихи ёки “велосипедни қайта кашф этиш” керакми(ди)?

Тошкентга қайтаётган трамвай ҳақида пойтахтда яшовчиларнинг фикри қандай?